domingo, 31 de enero de 2016

UN FEBREIRO DE CONCURSOS

Desde o blog convidámosvos a participar en dous concursos que xa comezaron hai uns días e que se prolongarán até o 19 de febreiro. Un deles é o tradicional concurso de relatos, este ano titulado Relatos Fantásticos. Todos aqueles que vos animedes a participar nel deberedes elaborar un relato de temática fantástica que teña unha extensión dunhas 25 liñas. Aqueles textos escritos a ordenador deberán ir en letra Arial 11. Neste concurso poderedes participar todos os alumnos de Primaria, Secundaria, F.P. e Bacharelato. Animádevos!



Mais os concursos non rematan aquí! Tamén vos convidamos a participar nun concurso de fotografía que este ano leva por título Un recuncho para o meu libro. Partindo deste tema, propoñémosvos que nos enviedes unha foto na que saia o voso libro favorito situado nun lugar que sexa un dos vosos rincóns habituais de lectura ou ben nun lugar no que vos gustaría ler relaxadamente. As fotos que presentedes deberán ser orixinais e teredes que envialas ao correo do Plan Lector: ofogardoslibros@gmail.com, indicando o voso nome e a vosa clase. Neste concurso poderedes participar todos os alumnos de 3º, 4º, 5º e 6º de Primaria, de Secundaria, de F.P. e de Bacharelato.


Tanto os relatos como as fotos poderanse enviar até o día 19 de febreiro.

miércoles, 27 de enero de 2016

A HISTORIA DE ERIKA

Hoxe, 27 de xaneiro, data na que se celebrou o "Día Internacional de Conmemoración en Memoria das Vítimas do Holocausto", queremos recomendarvos unha lectura: A historia de Erika, con texto de Ruth Vander Zee e ilustracións de Roberto Innocenti, publicada en galego pola editorial Kalandraka.








"Nacín en 1944. Non sei o día. Non sei que nome me puxeron. Non sei en que cidade nin en que país vin ao mundo. Tampouco sei se tiven irmáns. O que sei é que cando a penas contaba cuns meses salváronme do Holocausto..."

Esta obra sitúanos ante unha historia estremecedora e impactante, a de Erika, unha muller marcada polo seu pasado, o dunha supervivente do maior xenocidio cometido no século XX, e que hoxe, moitos anos despois da liberación do campo de exterminio de Auschwitz, nos serve para concienciar aos novos lectores dunha traxedia que nunca debe repetirse.

domingo, 24 de enero de 2016

WELCOME TO LONDON AND PARIS...

Esta semana na que visitamos a Torre Eiffel e o Big Ben comezou cun luns no que desfrutamos cos nenos de 4º de Inf. da obra de Rascal e Rita Van Bilsen titulada Señorita Pluma (Kalandraka), unha historia chea de tenrura protagonizada por unha nena e un oso moi especiais. Os pequenos de 4º de Inf. B tiveron o pracer de escoitar este conto na boca de Adriana Otero Gómez e de Icía Gómez Betancur, alumnas de 4ºA de Primaria.



Adriana repetiu como contacontos nas outras dúas sesións da xornada, nas que os alumnos dos grupos A e C de 4ºde Inf. asistiron tamén á lectura de Señorita Pluma. Nestas dúas sesións, Icía leu o conto xunto coa súa compañeira de clase Helena Blanco Rodríguez.





E para todos aqueles que aínda non lestes Señorita Pluma, a obra está a agardar por vós na biblioteca.



Xa na xornada do martes volvemos recibir a visita dun monstro moi entrañable: Monstruo Rosa (Apila Ediciones), de Olga de Dios, co que Cristina Mouriño Domínguez (4ºESO A) lles lembrou aos nenos de 6º de Inf. A o valor da diferencia e a importancia de encontrar o noso lugar no mundo.


Os nenos desfrutaron enormemente tanto da lectura da obra como da posterior conversa á que Cristina os animou coa fin de reflexionar sobre algúns aspectos do conto.




O martes continuou coa obra de María Canosa e Dani Padrón titulada Papá, que son os sorrisos? (Galebook), coa que lembramos cos nenos de 6º de Inf. B a importancia do  respecto á natureza.



O mércores continuamos coa lectura de A fuxida (Biblos), obra escrita pola galega Berta Dávila e ilustrada pola tamén galega Inma Doval, coa que nos achegamos a un tema tan de actualidade: os desprazados pola guerra. Se a semana pasada foron os alumnos de 2ºB e 3ºB de Primaria quenes desfrutaron con este libro, nesta ocasión tocoulles aos nenos de 2ºC e 4ºC mergullarse na historia de Nadia e da súa familia, a cal nos permitiu debater acerca da guerra e a violencia e reflexionar sobre todo o que cada un de nós, no noso día a día, podemos facer para evitar estes males.

Mais esta semana non só viaxamos á guerra, senón que tamén nos dedicamos a actividades máis agradables, como a visitar dúas cidades tan fermosas como París e Londres. Até alí viaxamos cos nenos de 5º de Infantil a través de dúas sesións de contacontos en inglés desenvolvidas arredor de dous libros creados por Ashley Evanson e publicados pola editorial Grosset and Dunlap: Paris. A book of shapes e London. A book of opposites



Até París viaxamos da man de Alicia Abella Senra e de Agustina Ferreira Díaz, alumnas de 2º ESO B, que nos guiaron por lugares tan representativos da cidade como a Torre Eiffel, o Museo do Louvre ou a Catedral de Notre-Dame:



Diego Ferreiro García e Laura González Santos, tamén de 2ºESO B, foron os encargados de levarnos até Londres, e de achegarnos a algúns dos aspectos máis característicos da cidade, como os autobuses de dous pisos, a hora do té ou as peculiares cabinas telefónicas.



E a semana rematou achegándonos a O segredo de Flora (Edicións Embora), de Paloma Rodríguez. Nesta obra encontrámonos con Flora, unha nena cun grave problema: ás veces sente unhas ganas tremendas de berrar, de morder, de pegar, de dar patadas e de empurrar, mais cando o fai o alivio é só momentaneo, pois os seus amigos choran, os seus pais enfádanse... Flora non está contenta, polo que procura unha maneira de controlar esa rabia que a invade.


Os nenos de 6º de Inf. C escoitaron a lectura desta obra na voz de Gaia Perfini Benoit e de Sara Fernández Cedeira, alumnas de 4ºB de Primaria:




E nuns minutos comezamos xa outra nova semana, na que volveremos tomar o avión, esta vez para viaxar até os Estados Unidos, onde visitaremos New York e San Francisco.




sábado, 16 de enero de 2016

UN PEIXE DE CORES, UNHA RATIÑA MOI PRESUMIDA, UN PAR DE MONSTROS E UNHA FUXIDA

Esta semana a biblioteca volveu encherse de contos e... de contacontos. O luns achegámonos a un dos grandes valores que debe rexer a vida de todos nós: a solidariedade. Esta solidariedade observámola nas distintas personaxes que aparecen na obra O grilo Míllelo (Edicións Embora), que intentan axudar ao grilo protagonista do libro a superar o seu problema, e é que o grilo Míllelo non podía cantar. Sempre é un pracer levar a cabo actividades ao redor deste conto, escrito por Xosé Manuel Varela,  profesor do Fogar, e Icía Varela Gómez, alumna do noso Centro.



O encargado de contarlles este fermoso conto aos nenos de 4º de Inf. B foi Yago Reboyras Ochoa (4ºB de Primaria), quen fixo desfrutar aos pequenos coas aventuras deste grilo tan especial. E especial foi tamén o feito de que entre os nenos que escoitaron o conto estivera Gonzalo, irmán de Yago, que puido así gozar desta historia na boca do seu irmán.




Na segunda sesión da xornada Muriel Costa Blanco, Ainhoa Seguín Grimón e Tatiana Santos Arbizu, alumnas de 4ºC de Primaria contáronlle aos nenos de 4º de Inf. C un dos grandes clásicos da nosa biblioteca: El pez Arcoiris (Beascoa), unha obra escrita por Marcus Pfister que nos lembra a importancia de saber compartir.


E como acontecera na primeira das sesións, tamén aquí vivimos un momento máxico no que un irmán puido escoitar unha historia de boca do seu irmán. Nesta ocasión, foi Ariadna quen desfrutou de El pez Arcoiris contado por Muriel.




E rematamos o luns cunha terceira sesión desenvolvida novamente por estas tres contacontos de primeira, que desta vez contaron aos pícaros de 4º de Inf. A A ratiña presumida, na orixinal adaptación do famoso conto tradicional elaborada para Kalandraka por José Antonio López Barreño, con debuxos de Pablo Mestre.







Xa na xornada do martes, Javier González Martínez (1ºESO C) fíxonos reflexionar sobre temas fundamentais como a tolerancia ou a autoestima a través dun clásico da literatura infantil como El hombrecillo de papel (Ed. Miñón). 


Javi leu este fermoso conto de Fernando Alonso aos nenos de 6º de Inf. A, e tamén á súa ex-profesora Puri, encargada deste grupo.





A segunda sesión do día estivo protagonizada por un monstro moi especial, que xa nos visitou a semana pasada e que estes días fixo desfrutar aos nenos de 6º de Inf. B. A obra de Olga de Dios titulada Monstruo Rosa (Apila Ediciones) é un fermoso conto que nos lembra o valor da diferenza. 


Aquí podedes ver como os pequenos, moi atentos, seguen a lectura:





Agora que se achega o Día Escolar da Paz e da Non Violencia, pareceunos oportuno comezar a tratar un tema que, por desgraza segue moi presente no mundo actual: a guerra. Así, centrándonos nunha das terríbeis consecuencias deste mal, como son os millóns de desprazados que causa (tamén, tristemente, moi de actualidade), o mércores compartimos cos nenos de 2ºB e 3ºB de Primaria a lectura de A fuxida (Biblos), unha historia sobre a guerra escrita pola galega Berta Dávila e fermosamente ilustrada por outra galega: Inma Doval. Trátase dun libro que desde o blog recomendamos a todos aqueles pais que queiran tratar este delicado tema cos seus fillos e que nos levou a reflexionar sobre a guerra e a plantexarnos preguntas que tratamos de responder entre todos. Porén, quen pense que este é un libro que transemite tristeza, está moi errado, pois, malia o tema que trata, o gusto que nos deixa a lectura é de ledicia por unha historia de aventura, a da nena Nadia e a súa familia, que remata cun final que nos transmite optimismo e esperanza perante unha nova aventura que comeza. A obra constitúe unha homenaxe aos que nunca se renden, aos que son capaces de comezar unha nova vida noutro lugar, sabendo que o verdadeiramente importante é estaren xuntos, mais tamén constitue unha homenaxe a todos aqueles que, na súa fuxida, quedan no camiño.


O texto de Berta Dávila encontra o mellor compañeiro de viaxe nas vistosas ilustracións que o acompañan, cheas de cores vivas, tal e como podemos ver na portada do libro, na que aparece Nadia, a protagonista, abrazada ao seu inseparable Osiño. Sen dúbida, as fermosas ilustracións son unha razón máis para ler esta obra de dúas galegas con moito presente e maior futuro.
















Aquí vos quedan unhas fotos dos nenos atendendo á lectura:




Xa avanzando a semana, chegamos ao xoves, día no que Lucía Costa López (1ºESO A) agasallou cunha sesión de contacontos ao grupo de 6º de Inf. A. Os pequenos puideron desfrutar así de A que sabe a lúa? (Kalandraka), unha obra de Michael Grejniec coa que os animais da selva nos ensinaron que as cousas compartidas saben moito mellor.


Os nenos gozaron escoitando a Lucía:




Esta semana, os tres grupos de 5º de Inf., en cadansúa sesión, puideron desfrutar de Adiviña canto te quero (Kókinos), un conto escrito polo autor norirlandés Sam McBratney, que a través da historia de dúas lebres cheas de tenrura, nos amosa como en moitas ocasións, cando queremos moito a alguén, resulta complicado encontrar o modo de describir o tamaño dos nosos sentimentos, pois o amor verdadeiro é, realmente, inconmensurable.


Os pícaros de 5ºA e 5º C de Inf. tiveron a sorte de escoitar este conto na boca de Candela Garea Veiga e de Noa Tenreiro Fraga, alumnas de 4ºC de Primaria, que caracterizadas de lebres fixeron as delicias dos pequenos. Ademais, logo da lectura da obra, os nenos dos tres grupos elaboraron unha tarxetiña a modo de broche que levaron para casa, na que destacaba, sobre un fondo negro, o título do conto e unha lúa chea alusiva á frase coa que finaliza a obra: "Eu quérote de aquí á lúa... E VOLTA".




















Na xornada do venres tamén tivemos oportunidade de asistir a outra sesión de contacontos "entre irmáns", pois Patricia Vélez Macho, xunto con Lucía Costa López, compañeira de 1ºESO A, ensinaron aos nenos de 6º de Inf. A, ao que pertence o seu irmán Alejandro, como deben actuar fronte a monstros de todo tipo, grazas ao libro ¿Cómo machacar monstruos? (Edaf), de Catherine Leblanc e Roland Garrigue. 



Grazas a Patricia, a Lucía e a esta obra, os nenos de 6º de Inf. A xa contan con divertidos, enxeñosos e prácticos consellos para enfrontarse a todos eses monstros que os asustan. Adeus medos!




E rematamos a semana coa lectura de Non fai falta a voz (OQO), un fermosísimo libro de Armando Quintero que nos lembrou que o amor e o cariño se transmiten de moitas maneiras, non só coa voz. E é que, a miúdo, non precisamos das palabras para dicir "quérote", pois un simple xesto ou un "grazas" pode ser moito máis importante.


Esta obra permitiunos despedir a semana, xunto cos nenos de 6º de Inf. C, cun forte "adeus" cheo de tenrura:




Xa está en marcha o 2º trimestre. Moitos contos agardan por nós!