sábado, 19 de diciembre de 2015

ENTRE CONTO E CONTO CHEGARON AS VACACIÓNS DE NADAL

Esta semana despedimos o primeiro trimestre con actividades tan divertidas como a visita do Apalpador ou de Mamá Noel e os seus renos.

O luns a biblioteca recibiu os nenos de 5º de Inf. A, que desfrutaron dunha sesión de contacontos dirixida por Muriel Costa Blanco e Ainhoa Seguín Grimón, alumnas de 4ºC de Primaria. Muriel e Ainhoa comezaron a tarde mergullando os pequenos nas páxinas de Me marcho, ¡adiós! (SM), escrito por Ricardo Alcàntara e ilustrado por Antonia Santolaya, unha obra na que nos atopamos con Rosendo, un moniño que, logo de enfadarse coa súa nai porque non lle mercaba todo o que quería, decide marchar da casa na procura dunha nova nai. Porén, como vimos na lectura, Rosendo non vai ter sorte: encontrarase cunha xirafa, cun ourizo e cunha mofeta, mais todos teñen algún defecto. De súpeto, Rosendo ve a súa nai, que saíra a buscalo, e, sen poder evitalo, dálle unha aperta. Xunto a ela sentíase protexido.






Na segunda parte da sesión, Ainhoa e Muriel fixeron reflexionar os nenos sobre a liberdade e os dereitos dos animais, por medio dunha obra que xa traballamos con outros grupos: A viaxe de Pancho (Kalandraka), unha fermosa historia escrita e ilustrada por Antonio Santos.




Porén, se nesta semana tiveramos que escoller un protagonista, este ben podería ser O Apalpador, personaxe que nos visitou estes días, facendo un percorrido por Infantil e Primaria.






O Apalpador presentouse aos rapaces e contoulles un conto sobre a súa persoa, titulado Antón e O Apalpador (Barafunda Editorial), con textos de Manuel Castro Lima e Mª Mar Ameixeiras Sánchez e ilustracións de Francisco Ameixeiras Sánchez.


Este vello carboeiro do Caurel tamén foi protagonista doutras sesións nas que seguimos a desfrutar cun conto que xa leva con nós varias semanas: O Apalpador (Biblos), escrito e ilustrado por Xoán G.


Especialmente divertida foi unha das sesións do martes, na que Martín Domínguez Piñeiro, Víctor Martín García e Miguel Peña Iglesias, alumnos de 4ºC de Primaria contaron este conto aos nenos de 6º de Inf. A.









Outros grupos, como 6º de Inf. B, gozaron tamén con este conto:





E 6º de Inf. C tamén puido escoitalo:





E como se dun paxaro se tratase, o conto voou da biblioteca ás aulas e chegou, por exemplo, a 5ºB de Primaria, onde Uxía Quintas García llo leu aos seus compañeiros de clase:







Mais estes días tamén as outras personaxes do Nadal invadiron o Colexio, e así, os alumnos puideron desfrutar dun belén vivinte e da visita dos Reis Magos ou de Papá Noel. Especialmente interesante resultou a visita de Cristian Emanuel Chira (1ºESO C) ás aulas de Infantil e primeiros cursos de Primaria. Cristian, natural de Romanía, explicou aos pequenos como se celebra o Nadal no seu país, que comeza coa chegada de San Nicolás na madrugada do 6 de decembro. Mamá Noel e os seus renos tampouco quixeron perder a ocasión e pasaron a repartir lambetadas polas clases de Infantil.




Mais a temática do Nadal, protagonista esta semana, non foi a única que fixo desfrutar aos nenos estes días, e así, o venres asistimos a un novo duelo entre bruxas e monstros. Logo de que as primeiras gañaran por unha mínima diferenza o concurso "Bruxas vs. Monstros", acadando unha maior puntuación cos seus libros, agora asistimos a un novo duelo entre estes dous grupos: debían actuar ante os seus compañeiros de curso (5º de Primaria), que serían os encargados de escoller o gañador votando a man alzada. Así, as bruxas leron o xa famoso libro ¿Cómo machacar monstruos? (Edaf), mentres que os monstros fixeron o propio con ¿Cómo machacar brujas? (Edaf). 





O resultado volveu ser axustadísimo e, aínda que as bruxas se impuxeron na primeira actuación, ante 5ºB, os monstros lograron máis votos ante 5ºA e 5ºC, polo que resultaron vencedores deste segundo duelo. 








E así, entre contos e contos, chegamos ao derradeiro día do trimestre, que finalizou con dúas das actividades máis divertidas do ano: o Recital de Vilancicos e o Concurso de Monólogos. Neste último resultou gañador Jesús Domínguez Blanco, de 3º ESO B.

Agora toca desfrutar do Nadal coa familia e os amigos. Moi pronto comeza o segundo trimestre, con novas actividades para todos, moitas das cales xa levamos semanas ensaiando. Obras de teatro, sesións de contacontos e até un xuízo ao Lobo Feroz están a agardar por nós no 2016.

sábado, 12 de diciembre de 2015

O APALPADOR, MOITO TEATRO E UN CAN CHAMADO GASTÓN

Esta semana lectiva de tan só tres días comezou na biblioteca coa visita dos alumnos de 3ºB de Primaria, que puideron coñecer ao Apalpador grazas ao fermoso conto de Xoán G. O Apalpador, publicado por Biblos.


Por medio desta obra os rapaces achegáronse a este xeneroso carboeiro do Caurel, que coa súa barba rubia e a súa boina, baixa cada 24 de decembro desde as altas montañas nas que vive para facerlle unha particular visita aos nenos galegos: entra paseniño nas casas, sen facer ruído, e apalpa as barrigas dos pícaros que durmen a pracer para saber se están ben alimentados. Logo, como agasallo de Nadal, déixalles unha presa de castañas e algún regalo.

E ao mércores seguiu o xoves, xornada na que o teatro inundou a biblioteca da man dun grupo de alumnos de 6ºC de Primaria, que representaron unha adaptación teatral da obra O traxe novo do rei (Kalandraka), na versión realizada por Xosé Ballesteros do famoso conto de Hans Christian Andersen.



A obra, representada en tres pases ao longo do día, permitíu aos tres grupos de 5º de Infantil e aos compañeiros de clase destes actores tan profesionais, rir a cachón cunha xornada teatral que só se pode calificar como: enormemente divertida.















Moitas grazas, Eugenia, Fernando, Ana Souto, Hugo, Ana Robles, Laura e Raquel por todos os recreos que pasastes ensaiando na biblioteca, polo voso esforzo e bo humor durante estes ensaios e pola vosa xenerosidade á hora de preparar a obra para o desfrute dos pequenos.



Xa no último día da semana, os nenos de 6º de Inf. C desfrutaron cunha deliciosa obra escrita por Kelly Dipucchio e ilustrada por Christian Robinson: Gastón (Andana Editorial), unha conmovedora historia que nos lembra que o verdadeiro sentido de pertenza vén de dentro.







Porén, a nosa semana deu para moito máis. Así, recibimos tamén un gran agasallo froito da xenerosidade da familia Garea Veiga e, en especial, de Candela, alumna de 4ºC de Primaria que xa nos fixo desfrutar máis dunha vez co seu bo facer como contacontos, e que nesta ocasión doou un lote de libros para que todos vós, os alumnos do Fogar, os poidades desfrutar. Na foto que deixamos a seguir podédela ver cunha das obras que doou: La guerra de los gigantes, a segunda entrega de Ossidea, a apaixonante saga de fantasía épica escrita por Tim Bruno e protagonizada por David Dream, un mozo que acaba nun reino descoñecido cunha misión desesperada que cumprir: chegar á Cidade do Ceo e salvar os elfos do sanguinario exército de Kahós.



E ademais, non podemos rematar esta entrada sen dar a benvida a un interesante blog creado por Lucía Costa López (1ºESO A), unha das alumnas que máis colabora coas actividades do Plan Lector e das máis comprometidas co fomento da lectura entre os seus compañeiros dos diferentes niveis. Se vos apaixonan os libros non dubidedes en entrar en http://el-mundode-los-libros-espana.webnode.es/, un lugar onde atoparedes obras recomendadas por outros alumnos do Fogar, e onde vós tamén poderedes suxerir lecturas.

miércoles, 9 de diciembre de 2015

E AO FINAL... GAÑARON AS BRUXAS

Hai varias semanas comezamos unha actividade á que chamamos "BRUXAS CONTRA MONSTROS". Nela, vista a rivalidade xurdida entre as bruxas e os monstros na nosa biblioteca, tratabamos de decidir cal dos dous terroríficos grupos é o mellor. Para iso fixemos unha selección de libros, por unha banda obras sobre monstros e por outra obras sobre bruxas, que puxemos a disposición dos alumnos nunha mesa da biblioteca. Os rapaces que quixeran participar na actividade tiñan que coller un libro dos alí expostos (ou varios), lelo e, finalmente, puntualo do 1 ao 10 en función de se lles gustou moito ou pouco. Ao final da actividade, sumariamos os puntos logrados por un e outro bando para ver quen era o grupo gañador.

Foron moitos os rapaces que se animaron a participar, entusiasmados, en grande medida, por unhas bruxas e uns monstros de 5º de Primaria moi especiais, que leron a compañeiros doutros cursos libros de monstros e de bruxas.








E tamén, por mor das visitas polas clases duns horribles monstros e dunhas terroríficas bruxas de 1º da ESO.



Semana a semana fomos sumando os puntos de cada grupo e, tal e como pudestes ir comprobando nas puntuacións que fomos expoñendo nunha cartolina na porta da biblioteca, a situación amosouse enormemente igualada desde o comezo. Así, a emoción mantívose até o derradeiro día, mais finalmente as gañadoras foron as bruxas por 587,9 a 580,4.

E cales foron os libros que máis vos gustaron da nosa selección de bruxas e monstros? Pois tendo en conta as puntacións que fostes outorgando ás distintas obras, estes foron os mellor valorados:


1. As bruxas (Xerais), de Roald Dahl.
2. El pequeño vampiro (Alfaguara), de Angela Sommer-Bodenburg.











3. A bruxa tola (Xerais), de Josep Gregori.













4. O manual das bruxas (Xerais), de Malcolm Bird.







5. Dominicus, o dragón (Tambre), de Antón Cortizas.







Moitas grazas a todos os que participastes!