lunes, 30 de mayo de 2016

UNHA MACEIRA, UN CAZO, UN NARIZ DE OURO E... CANTO TE QUERO, PROFE!

A pasada semana, como é habitual, desfrutamos na biblioteca de diversas sesións de contacontos, que nos serviron para comprender mellor o mundo que nos rodea, para entendernos mellor a nós mesmos e para viaxar até lugares aos que só a fantasía contida nos libros nos permite chegar. Unha das sesións de contacontos que máis nos gustou foi a que viviron os nenos de 5º de Inf. A e de 6º de Inf. A, e que estivo protagonizada por unha obra de Pinto & Chinto, titulada A maceira que daba calquera cousa menos mazás (Everest).



Esta obra, recén chegada á biblioteca, encantounos polas mensaxes positivas que transmite, animándonos, por exemplo, a confiar en nós mesmos e a crer nas nosas posibilidades naquilo que persigamos. Ademais, este libro lémbranos  algo moi importante: igual que as árbores e os seus froitos, as persoas medramos a un ritmo diferente, que non se debe forzar.



Estes dous grupos de Infantil tiveron a sorte de asistir a outra sesión, na que puideron escoitar El cazo de Lorenzo (Editorial Juventud), escrito pola francesa Isabelle Carrier e recomendado pola FEAPS (Confederación Española de Organizacións en favor das Persoas con Discapacidade Intelectual). E de que trata esta obra? Pois o conto amósanos, mediante palabras sinxelas e unhas ilustracións cheas de tenrura, o día a día dun neno diferente: as súas dificultades, as súas calidades, os obstáculos que ten que afrontar... Estamos ante un fermoso conto metafórico que nos axuda a falar aos máis pequenos de aspectos como as diferenzas e a capacidade de superación.








Lucía Castiñeira Rial e Antía Pérez Viñas (6ºA), e Laura Varela Anido (6ºB) fixeron unha lectura dramatizada da obra, transmitindo perfectamente a mensaxe da historia.





Lucía, Antía e Laura fixérono tan ben diante dos nenos de Infantil, que os seus compañeiros de 6ºA non quixeron deixar pasar a ocasión de escoitalas:



Outro dos contos que nos acompañou estes días foi La vocecita (Kókinos), de Michael Scoffier, unha historia chea de humor que arrincou numerosas gargalladas entre os nenos de 5º de Inf. C que asistiron á súa lectura, e que nos permitiu responder a unha pregunta: que é a conciencia?



Aquí podedes ver os nenos en pleno debate, logo de escoitar o conto:




Cos nenos de 5º de Inf. B lemos un libro que chegou estes días á biblioteca, e que esperamos que faga pasar moi bos momentos aos nenos do Fogar: Nariz de ouro (OQO), escrito por Raquel Saiz e ilustrado por Juliana Bollini. Esta obra está protagonizada por un neno moi serio ao que non lle chista nada que lle chamen Eduardiño. Porén, na escola, todos lle chaman así e incluso se meten co seu enorme nariz. A verdade é que vivir cun nariz tan grande, polo que até tes que pagar dous asentos no autobús, non é nada sinxelo, aínda que Eduardo conta co apoio da súa nai, que todas as noites lle le O patiño feo. Eduardo xa sabe como acaba ese conto: co pato transormándose en cisne, mais, a quen lle importa non ser un cisne? Que ten de malo ser un pato?


Estamos perante un conto que nos amosa a importancia da autoestima no crecemento de toda persoa. E por esta razón, logo da lectura, conversamos cos pequenos acerca do importante que é que nos aceptemos tal como somos. Todos temos cousas que nos fan diferentes, especiais. E que aburrido sería o mundo se todos fosemos iguais!



O libro dos Porcos (Kalandraka), a xenial obra de Anthony Browne que nos vén acompañando desde hai varias semanas, serviunos un día máis para falar da importancia de repartir as tarefas da casa.


Nesta ocasión, foron os nenos de 6º de Inf. B quenes desfrutaron deste libro:




E a pasada semana tamén vivimos unha aventura apaixonante coa obra de Michael Rosen titulada Imos cazar un oso (Kalandraka), un fermoso álbum ilustrado por Helen Oxenbury.

Os pequenos de 6º Inf. C, ao igual que os protagonistas da obra, tamén saíron á caza dun oso, tal e como podedes ver nas fotos:









Logo desta aventura, chegou o momento de relaxarnos cunha obra que xa nos visitou a semana anterior, La máquina de los abrazos (Andana Editorial), de Scott Campbell, un libro que nos fala da importancia de expresar as nosas emocións e do inmenso poder dos abrazos.


Aquí tedes os nenos de 6º de Inf. C escoitando este conto atentamente:




Mais o momento máis emocionante da semana chegou cos nenos de 4ºC de Primaria, que quixeron amosar todo o cariño e o agradecemento que senten pola súa profe, Tina, léndolle Canto te quero, profe! (Edicións Embora), de Paloma Rodríguez.


Un tras outro, cada neno da clase foi lendo un fragmento do libro, até rematar cun berro moi merecido dirixido á súa mestra: Canto te quero, profe!








E esta fermosa homenaxe, que fixo saltar máis dunha bágoa, só podía rematar dun xeito: cun enorme abrazo colectivo dos alumnos á súa profe. Ese abrazo queremos mandarcho tamén nós, Tina, desde a biblioteca, por toda a xenerosidade, paciencia e amor cara aos alumnos que amosas en cada unha das actividades que realizamos.



E non queriamos acabar esta entrada sen facer mención a unha das moitas saídas que realizaron os alumnos do Fogar esta pasada semana, en concreto á visita que os pequenos de 1º de Primaria realizaron á Fundación ABANCA, na que puideron desfrutar de obras de artistas da talla de Picasso, Miró, María Blanchard ou Kandinsky.


Se queredes saber máis sobre esta saída, picade aquí.

E nos despedimos acabando xa o luns, día no que recibimos unha visita moi especial. Queredes saber de quen estamos a falar? Pois estade moi atentos á próxima entrada do blog, pois anunciamos que haberá sorpresas...



miércoles, 25 de mayo de 2016

CONTOS, ABRAZOS, VISITA Á GRANXA O VENTOSO E UNHA CIFRA MOI ESPECIAL

Esta semana pasada, na que só tivemos tres días de "cole", tivo un claro protagonista: os abrazos. Así, grazas a unha fermosa obra de Scott Campbell recén chegada á biblioteca, titulada La máquina de los abrazos (Andana Editorial), falamos cos nenos da importancia de expresar as nosas emocións, da empatía e do inmenso poder dos abrazos. Se este álbum está agora á vosa disposición na biblioteca é grazas a Candela Garea Veiga, alumna de 4ºC de Primaria, que nolo recomendou. A obra gustounos tanto que decidimos adquirila. Así que: moitas grazas, Candela! E todos aqueles que queirades suxerirnos lecturas, xa sabedes...

Alba Carrodeguas Rodríguez e Marta García Rojo, alumnas de 3ºESO A foron as encargadas de achegar a obra aos pequenos de Infantil:



Aquí podedes ver os nenos atentos á lectura:




E este contacontos só podía rematar dunha maneira: con abrazos!


E non só os nenos de Intantil puideron gozar coa obra de Scott Campbell, senón que tamén os pícaros da Gardería desfrutaron dela grazas a Noa Rama Budiño (4ºB de Primaria):



Marta e Alba, axudadas esta vez por Raquel Arias Pombo (tamén de 3ºESO A), contaron aos nenos de Infantil un novo conto: Tibulí sueña con colores (Planeda DeAgostini), de Myriam Ouyessad e Arnaud Nebbache, unha fermosa historia protagonizada por un pequeno oso polar que, farto do branco omnipresente do seu mundo, decide marchar na procura doutras cores.





Estes días tivemos o pracer de recibir na biblioteca unha nova obra que xa está a disposición de todos vós, e coa que xa desfrutaron os pequenos de 6º de Inf. C. Esta obra non é outra que El dragón rojo (Libros del zorro rojo), de Max Velthuijs, un clásico que, sen dúbida, traerá moi boas lembranzas a nais e pais, e que nos lanza unha mensaxe que se antolla fundamental nos nosos días, a prol da convivencia e do respecto.


A historia sitúanos nun pequeno país situado nos confíns do mundo, onde a vida transcorre de maneira apracible e sen contratempos, até que un día aparece un enorme monstro. Ao principio os campesiños téñenlle medo, mais pouco a pouco van vendo que, máis alá de comer os seus cultivos, a criatura non parece representar ningunha ameaza, polo que primeiro deciden convertelo nun eficaz soldado e, máis tarde...


...nunha atracción turística.


Mais o certo é que ao monstro non parece interesarlle nada disto. O que si se lle dá realmente ben é botar lume pola boca! Mais, que utilidade pose ter isto para eles? Se queredes coñecer a resposta e saber como acaba esta fermosa historia non tedes máis que achegarvos á biblioteca a botarlle un ollo a este álbum ilustrado que, dunha maneira orixinal e desenfadada, nos achega a temas como a discriminación, a liberdade e, incluso, as enerxías renovables.


Aquí tedes aos pícaros de 6º de Inf. C desfrutando co conto:




Outro dos libros que nos ocupou estes días, e que xa viramos con varios grupos, foi A cousa que máis doe do mundo (OQO), de Paco Liván.



Esta vez as encargadas de achegar esta obra aos nenos foron Paula, unha das nosas orientadoras, e Nerea Díaz Balseiro (2ºESO C), que reflexionaron cos nenos de 1ºC de Primaria sobre o tema fundamental do libro: a mentira.



E por este curso rematamos cunha das nosas obras favoritas: O monstro de cores (Flamboyant), coa que Anna Llenas nos permitiu viaxar polo mundo das emocións.



Nesta ocasión foron os alumnos de 2ºC de Primaria os que riron e reflexionaron con este fermoso álbum ilustrado, que nos axudou a responder a preguntas como: que nos pon alegres? ou, que é iso da tristeza?



Todos os nenos, logo de escoitar o conto e de conversar sobre el, escribiron en tarxetas os seus pensamentos acerca de emocións como a tristeza ou o medo:





Despois chegou o momento de elaborar o mural:


Nel os pequenos foron pegando as tarxetas que previamente lemos entre todos:



E, como xa fixeramos semanas atrás, te quiero (casi siempre), a xenial obra de Anna Llenas publicada pola editorial Espasa e protagonizada por Lolo e Rita, volveunos visitar estes días. Como xa acontecera, esta fermosa historia invitounos novamente  á comprensión de aquilo que nos fai diferentes e amosounos o máxico efecto dos polos opostos.



Alba Seijas Longueira e Alba Iglesias Arias, de 4ºC de Primaria, foron as encargadas de achegar a historia aos seus compañeiros de clase. Parabéns ás dúas polo ben que o fixestes!




Mais os contacontos aínda non acabaron neste curso e varios grupos están a preparar novas historias. Calquera momento é bo para practicar. Aquí podedes ver como dous dos grupos de 4º aproveitan o recreo para ensaiar:




Hoxe, antes de rematar, queriamos compartir con todos vós dous momentos moi fermosos. O primeiro deles foi a visita que os pequenos de 5º de Infantil fixeron o venres pasado á Granxa O Ventoso (A Laracha), e que lles permitiu achegarse ao mundo dos animais de granxa. Así, porcos, galiñas, cabras ou ovellas fixeron desfrutar aos nosos pícaros. Aquí podedes ver a Enma pasándolle o cepillo a un poni:


E aquí tedes a Daniela preparada para dar unha volta en poni:


Mais non só os animais fixeron desfrutar aos pequenos, que tamén puideron visitar a horta, facer pan e probar diferentes froitas. As mazás estaban tan ricas que provocaban sorrisos tan fermosos como o de Inés:


Se queredes saber máis sobre a Granxa O Ventoso, non tedes máis que picar aquí. E desde o blog aproveitamos para agradecer aos monitores o ben que nos trataron. Moitas grazas polo voso cariño e por todo o que nos ensinastes.

Todas as fotos da visita están á vosa disposición en O Fogar Infantil. Non volas podedes perder! Picade aquí.

O segundo destes momentos que queremos compartir con vós ten que ver cun dos nosos docentes, Carlos Medrano, mestre de Inglés en Primaria e profesor de Lingua e Literatura Galega en Secundaria, e que a pasada semana chegou aos 10.000 xeroglíficos en La Voz de Galicia. E é que Carlos leva publicando neste xornal estas adiviñas gráficas desde o ano 1988. 



Todos aqueles que queirades saber algo máis sobre esta noticia non tedes máis que picar aquí. E tamén vos convidamos a mergullarvos no seu blog, Xogos de lingua, no que encontraredes, entre outras moitas cousas, a entrevista que Carles Francino lle fixo a Carlos no programa La Ventana, da Cadena Ser, con motivo desta impresionante cifra dos 10.000 xeroglíficos.