martes, 23 de febrero de 2016

INVENTARIO ILUSTRADO DE INSECTOS

Con texto de Virginie Aladjidi, ilustracións de Emmanuelle Tchoukriel e tradución de Pedro A. Almeida, Kalandraka trae á biblioteca do Fogar o seu Inventario ilustrado de insectos, no que reúne até 65 especies de insectos de todo o mundo: coleópteros, lepidópteros, dípteros, himenópteros, isópteros...


Amosando un profundo traballo de investigación e observación, cada animal é analizado na obra nunha lámina ilustrada que inlúe o seu nome común, o nome científico e unha descrición das súas principais características, do lugar no que vive... Todo aquel pequeno afeccionado aos animais en xeral e aos insectos en particular desfrutará con este libro cheo de curiosidades que vén, ademais, acompañado dun interesante prólogo no que atopamos datos acerca da utilidade dos insectos, das súas características comúns ou da súa antigüidade na Terra, que se remonta a hai catrocentos millóns de anos.

E xunto a esta obra, recén chegados tamén á biblioteca, poderás atopar outros Inventarios elaborados igualmente por Kalandraka: 









sábado, 20 de febrero de 2016

COMEZAMOS CUN SEGREDO E REMATAMOS BAILANDO UN BOOGIE

A volta do Entroido trouxo consigo diferentes sesións de contacontos que xiraron, fundamentalmente, arredor de catro obras: dúas delas, O segredo de Flora e Quen pode vencer o vento?, servíronnos para reflexionar sobre aspectos tan importantes como a humildade, a constancia ou o dominio da ira; mentres que as outras dúas, A casa da mosca chosca e El boogie de los culitos, ambas enormemente divertidas, permitíronnos rir ás gargalladas grazas a uns animais moi especiais.

O segredo de Flora (Edicións Embora), de Paloma Rodríguez, ensinounos un método infalible para controlar esa rabia que nos invade en ocasións. Agora, grazas a este segredo, os nenos de 5º de Inf. A e C, e os seus compañeiros de 6º de Inf. A, xa nunca pegarán, nin morderán, nin berrarán cando se enfaden, pois cando noten que esas formigas que percorren o noso corpo cando nos enfadamos comezan a aparecer, lembrarán a canción que cantamos xuntos estes días:
Un, dous, tres,
o enfado polas mans.
Un, dous, tres,
o enfado polos pés.
Un, dous, tres,
o enfado xa se vai.
Un, dous, tres,
o enfado xa o botei.

E aquí tedes os pequenos dos diferentes grupos atendendo á lectura, que en varias das sesións correu a cargo dulgún dos alumnos "maiores", como Santiago Molinelli Marcote (1ºESO B), Álex Souto Novalbos (1ºESO A) ou Icía Varela Gómez (4ºESO A).







Desde o blog recomendamos este libro, sen dúbida un dos que máis fixo desfrutar aos nenos no que levamos de curso.



Mais os nenos de 5º de Inf., ademais de aprender a controlar esa rabia que nos invade cando nos enfadamos, tamén riron a cachón coa divertida historia dunha mosca chosca que, cansa de zoar e zoar, decidiu construír unha casa. Unha vez acabada a casa, fixo unha saborosa tarta de amoras para celebralo, e esta ulía tan ben que o seu aroma chegou ao nariz de numerosos animais do bosque, que acudiron a merendar tan suculento manxar... A casa da mosca chosca (Kalandraka), unha adaptación dun conto popular ruso realizada pola pontevedresa Eva Mejuto, conta, ademais, cunhas divertidísimas ilustracións realizadas por un artista multidisciplinar, como é o barcelonés Sergio Mora.





Nunha destas sesións foi Icía Varela Gómez (4ºESO A) quen leu o conto aos pequenos, que a escoitaron moi atentos:






E nestes días tamén ocupamos varias das sesións en reflexionar sobre o valor da humildade e da constancia, a partir da lectura de Quen pode vencer o vento? (OQO), de Charo Pita.


Ciro Ienco Montenegro e Aitor Pampín Pérez (ambos de 6ºC de Primaria) foron os encargados de contar este conto aos pícaros de 5º de Inf. B e aos de 6º de Inf. C. Ainhoa, alumna deste último grupo, desfrutou enormemente escoitando o conto na boca do seu irmán Aitor.




E o venres despedimos a semana bailando un divertido boogie cos nenos de 6º de Inf. C. Os pequenos foron dirixidos por cinco coreógrafas de 4º B de Primaria: Sara Fernández Cedeira, Lucía Fresco Regueira, Malena Mata Otero, Gaia Perfini Benoit e Lucía Rodríguez Blanco. Este baile realizámolo logo da lectura de El boogie de los culitos (SM), escrito e ilustrado por Guido van Genechten. Trátase este dun divertido libro que nos demostra que os pais poden coidar dos pequenos tan ben como as nais, aínda que en ocasións o fagan dun xeito ben peculiar.
Aquí vos quedan unhas fotos da sesión:





E como despedida, desde o Fogar queremos dar as grazas á familia Pampín Montero e á familia Martínez Ferreira, que estes días doaron cadanseu lote de libros para a biblioteca. Grazas á súa xenerosidade, todos vós poderedes desfrutar, por exemplo, de novas aventuras de Tea Stilton e de Kika Superbruja. Aquí vos queda unha foto de Emily María Martínez Ferreira (3ºC de Primaria) con tres dos libros que doou:



jueves, 11 de febrero de 2016

O MUNDO SECRETO DE BASILIUS HOFFMAN: O LADRÓN DE SOÑOS

Este 2016 que acabamos de comezar trouxo consigo moitas novidades á biblioteca do Fogar. Pouco a pouco irémosvolas presentando para que, se considerades que poden ser do voso interese, pasedes a botarlles un ollo ou a levalas en préstamo para a vosa casa. E comezamos esta rolda de presentacións cunha obra de fantasía escrita polo compostelán Fernando M. Cimadevila, e titulada O mundo secreto de Basilius Hoffman: O ladrón de soños (Urco Editora); un libro que só podemos cualificar como extraordinario, e que supón o punto de partida para a saga do profesor Basilius Hoffman: historiador, arqueólogo, cabaleiro a tempo parcial e truán a xornada completa. Nestas páxinas asistiremos á viaxe do protagonista e do seu sobriño Peter na procura do lendario Diario do Cartógrafo, na que descobriremos cidades perdidas no profundo da noite, sociedades secretas, misteriosas criaturas, poderosas reliquias sagradas...



Para achegarvos un pouco máis a esta apaixonante obra, aquí vos deixamos un booktrailer da mesma:



E se che gusta esta obra, poderás seguir desfrutando das aventuras de Basilius Hoffman grazas aos outros dous libros que completan a saga: Un faro na escuridade e A batalla por Avalon, tamén recén chegados á biblioteca do Fogar.

domingo, 7 de febrero de 2016

FUXIMOS DUNHA GUERRA, VISITAMOS NOVA YORK E SAN FRANCISCO E... CHEGAMOS AO ENTROIDO!

Estes días puidemos desfrutar na biblioteca de diversas sesións de contacontos, como a que Silvia Cruzado Caamaño e Sara Paz Añón, alumnas de 4ºA de Primaria, ofreceron aos nenos de 4º de Inf. B. Silvia e Sara fixeron gozar aos pequenos co libro Diez amigos (Imaginarium), escrito por Inés Rosales e ilustrado por Elena Odriozola, co que entre todos repasamos os números e coñecemos diferentes animais.





Pola súa banda, os grupos A e C de 4º de Inf. asistiron á representación dunha adaptación teatral realizada por Noelia Ares Vázquez, Isabel García López e Alba Soutullo Ogea (alumnas de 4ºA de Primaria), arredor da obra Teño unha avoa diferente ás demais (Fundación La Caixa), de Mercé Aránega. Por medio desta actividade achegámonos, dunha forma tan divertida como educativa, a unha realidade tristemente moi presente na nosa sociedade, como é o alzhéimer.




Tamén os pícaros de 6º de Inf. A viviron diferentes sesións de contacontos estes días. Nelas achegámonos a obras tan divertidas como A toupiña que quería saber quen lle fixera aquilo na cabeza (Kalandraka), escrita por Werner Holzwarth e ilustrada por Wolf Erlbruch.



Aquí vos deixamos unha canción sobre este conto xenial na voz non menos xenial de Manuel R. Crespo:



El lobito sentimental (Editorial Corimbo), de Geoffroy de Pennart, e El pez Arcoiris vuelve a casa (Beascoa), de Marcus Pfister, son outras das obras que puidemos desfrutar con nenos de 6 de Inf. A. Aquí vos queda algunha foto destes momentos:




Hilderita e Maximiliano (Kalandraka),escrita e ilustrada por Fernando Krahn, é a fermosa historia de dúas xoaniñas que, logo de se coñeceren na copa dun chapeu de copa, ficaron namoradas. Por esta razón, un bo día decidiron casar e comezaron unha viaxe voando polos aires. O destino? A lúa... Estes días foron os alumnos de 6º de Inf. B quenes desfrutaron desta historia de amor.


Os encargados de achegarnos a este conto foron Mateo Casal Guerra e Alexandre Andrei Chira, ambos de 4ºB de primaria. Mateo puido así contarlle un conto á súa irmá Candela.



Cos nenos de 6º de Inf. B tamén lembramos que compartir é desfrutar en compañía, grazas á historia de Sally Anne Garland titulada ¡Mío! No siempre es fácil compartir (Miau).



Aquí podedes ver os nenos moi atentos á lectura:



Ademais, nestes días fomos novamente de viaxe, desta vez a Nova York e a San Francisco. Até alí viaxamos cos nenos de 5º de Infantil grazas a dúas obras de Ashley Evanson, autora que xa nos levou en semanas anteriores até cidades como París e Londres. Laura Mella Ramírez e Alicia Pontide García, alumnas de 2º ESO C, foron as encargadas de guiarnos por Nova York, grazas a unha divertida sesión de contacontos en inglés desenvolvida arredor de New York. A book of colours (Grosset and Dunlap). 



A Estatua da Liberdade, o Empire State Building, Central Park ou a Ponte de Brooklyn foron algúns dos recunchos que visitamos con Laura e Alicia, á vez que repasabamos as cores.



Pola súa banda, Iago Rodríguez Lodeiro e Miguel Rodríguez Rial, alumnos de 2º ESO A, foron os nosos guías por San Francisco, grazas á obra San Francisco. A book of numbers (Grosset and Dunlap), coa que repasamos os números ao tempo que coñecemos algunhas das marabillas desta fermosa cidade, como a ponte Golden Gate ou os seus característicos tranvías.


Os nenos pasárono xenial con estes dous contacontos de primeira:




Mais como non todo van ser viaxes, tamén nos achegamos cos pícaros de 5º de Inf. a Un pesadelo no meu armario (Kalandraka), de Mercer Mayer, un clásico da Literatura Infantil que nos ensina a espantar eses pesadelos que nos invaden certas noites.



Icía Varela Gómez, alumna de 4º ESO A, foi a envargada de ler este conto a un dos grupos, 5º de Inf. C :



Nestes días tamén rematamos a lectura dunha obra que nos leva acompañando desde hai varias semanas: A fuxida (Biblos), escrita por Berta Dávila e ilustrada por Inma Doval. Con este conto tamén os nenos de 6º de Inf. C puideron achegarse a un tema tristemente moi de actualidade como é o dos desprazados pola guerra.



Os nenos seguiron atentos a lectura da obra e respiraron aliviados ao escoitar o final, no que Nadia e a súa familia, xa a salvo, se dispoñen a comezar xuntos unha nova vida.





Os nenos de 6º de Inf. C desfrutaron tamén nestes días con Bóla de manteiga (OQO), unha adaptación realizada por Ana Manteiga dun conto popular noruegués, magnificamente ilustrada por Iván Suárez.



Os nenos escoitaron con atención esta historia protagonizada por un neno comellón que pasaba o día a xogar, e a cuxa porta petou un día unha bruxa cun saco, que viña coa intención de levalo...




E con esta lectura rematamos uns días nos que a biblioteca ficou invadida por unha lexión de divertidísimos minions, pola xenial Mércores Adams, por piratas, paiasos, bruxas, fadas, vaqueiras...