lunes, 30 de octubre de 2017

AVOAS E AVÓS XENIAIS!

Estes días continuamos a desfrutar de auténticos libros andantes, como son as avoas e os avós, que nos visitaron para manter un encontro co grupo dos seus netos. Unha das visitas que máis nos emocionou foi a de María, avoa de Paula, de 2ºA de Primaria, que, acompañada da súa filla Teresa, nos falou da súa infancia nunha pequena aldea de cinco casiñas. Uns anos felices nos que, xunto cos outros nenos do lugar, ía á escola andando por camiños e corredoiras, enfrontándose ao frío con zocos ou botas de goma. Esta viaxe á escola os facía vivir aventuras como a de atravesar o río en egua nos días en que a chuvia traía a subida das augas. Todos desfrutamos coas mil e unha lembranzas que nos contou María, recordos dun tempo no que, como lle aclarou aos nenos, as tablets e Internet aínda non existían, e a televisión e a radio aínda non chegaran a unha aldea na que a xente vivía feliz, malia non ter nin electricidade nin auga corrente.

Aquí vos deixamos algunhas fotos da sesión, nas que María nos está a ensinar uns pequenos-grandes tesouros cos que nos sorprendeu na súa visita: a pequena pizarra e os libros que empregaba na escola.





Outro dos momentos máis especiais da semana o vivimos coa visita de Margarita, avoa de Dani, de 2ºB de Primaria, que nos falou dos seus anos nunha pequena escola da cidade da Coruña. Uns anos que, ao igual que María, lembra con ledicia, recordando as anécdotas vividas coas súas amigas e o amor duns pais marabillosos.




Tamén os avós de Antón, de 4º Inf. C se animaron a vir pasar un tempiño co seu neto e cos seus compañeiros. Ángel abraiounos a todos cun divertidísimo espectáculo de maxia, no que fermosas plantas xurdían da nada e no que libros en branco se enchían de cor.






Sara, pola súa banda, fíxonos desfrutar cun emocionante conto sobre os animais de granxa, que todos escoitamos atentos.




Marisa, avoa de Sofía, de 5º Inf. A, tamén nos agasallou cunha historia, neste caso Los siete cabritillos, que escoitamos desfrutando dos contos populares contados como só o saben facer as avoas:





María, avoa de Sabela, de 4º Inf. A, tamén nos fixo desfrutar cun conto moi propio destas datas: Corre corre, Cabaciña, un dos nosos álbumes favoritos, publicado por OQO con texto de Eva Mejuto e ilustracións de André Letria.




Merchi avoa de Pepe, de 5º Inf. C, nos achegou a unha historia como a de Os tres porquiños, un dos contos favoritos do seu neto. Este conto popular o escoitamos na versión de Kalandraka, con texto de Xosé Ballesteros e ilustracións de Marco Somá.




Isabel, avoa de Miguel, de 5º Inf. B, tampouco quixo perder a ocasión de pasar un tempiño con nós, e nos contou o apaixonante álbum de Michael Rosen e Helen Oxenbury Imos cazar un oso, publicado por Kalandraka, e o divertido Corre corre, Cabaciña, citado liñas atrás.




Élida, avoa de Mateo, de 1ºA, tamén veu visitarnos e, ademais de contos e historias, respondeu co seu eterno sorriso as mil e unha preguntas que este grupo de pequenos xornalistas lle fixeron.





Joaquín, que xa nos visitara hai uns días para manter un encontro co seu neto Martín e os seus compañeiros  de 1ºB, volveu pasar pola biblioteca para ler un conto á súa neta Estela e aos seus compañeiros de 4ºC. O conto que escolleu foi ¿Qué es el amor?, de Davide Cali e Anna Laura Cantone, publicado por Edelvives. 




Joaquín compartiu sesión con Ana, avoa de Sara, que leu para a súa neta e para os sus compañeros de 4ºA El diente de Rosalía, un divertidísimo libro escrito por Eva Eriksson e publicado por Austral.




Ás avoas e aos avós que nos visitastes estes días, só podemos darvos as grazas por regalarnos o voso tempo, por ensinarmos tantísimas cousas e por permitirnos desfrutar da amabilidade e do sentido do humor cos que pasastes pola biblioteca. Aos que aínda non vos decidistes a visitarnos, vos animamos a facelo. As vosas netas e os vosos netos están a agardar por vós!


GuardarGuardar
GuardarGuardar

viernes, 27 de octubre de 2017

TODOS CONTAMOS NA BIBLIOTECA DO FOGAR

Na biblio do Fogar todos contamos. Contan, por exemplo, Sabrina, Samantha e Marta (4ºB), que leron un fermoso conto para Leo, irmán de Sabrina, e os seus compañeiros de 4º de Infantil.



O libro escollido foi La máquina de los abrazos (Andana Editorial), de Scott Campbell, co que falamos de como expresamos as nosas emocións.


Aquí podedes ver algúns momentos da sesión:






Tamén contan Daniela e Sabrina (4ºC), que fixeron desfrutar aos pequenos de 6º Inf. C co divertidísimo álbum A toupiña que quería saber quen lle fixera aquilo na cabeza (Kalandraka), escrito por Werner Holzwarth e ilustrado por Wolf Erlbruch.




A quen non coñeza este clásico da literatura infantil, o animamos a rir a cachón coa investigación dunha toupiña que só quere saber quen lle deixou aquel "agasallo" na cabeza cando saíu do seu tobo. Sería a pomba? Ou quizais o cabalo? Para coñecer a resposta non tedes máis que coller o libro na biblioteca e mergullarvos nas súas páxinas.



E tamén contan Aarón, Pedro e Mateo (2ºA), que quixeron facerlle un agasallo á súa antiga profe, Ana, polo que leron La excavadora para os pícaros de 1ºC, o seu actual grupo.




E, por suposto, nós tamén contamos. Entre as obras coas que máis desfrutaron os pequenos destacan dúas, un clásico da biblioteca como Cocorico (OQO) e un libro que acaba de chegar aos nosos fondos, Peligro en el mar (SM).

Aquí podedes ver os nenos e as nenas de 5º Inf. A atendendo á historia de Cocorico, un pitiño un pouco lambón, que terá que fuxir das gadoupas do terrible Gato Pelado.





Recomendámosvos, sen dúbida, este libro tan divertido como terrorífico, escrito por Marisa Núñez e ilustrado por Helga Bansch.



E, como dixemos, os pequenos tamén desfrutaron enormemente cun libro que acaba de chegar á biblioteca, Peligro en el mar, unha historia de Begoña Ibarrola, que a través dun cabaliño de mar chamado Quino e dos seus amigos do océano, nos lembra que fronte a un problema o que temos que facer é procurar unha solución.




Animámosvos a achegarvos a esta fermosa obra incluida na colección "Cuentos para sentir", de SM.



E tamén contamos en Primaria, obras como a que Iria leu aos seus alumnos de 6ºA. Mis amigos, un álbum de Taro Gomi publicado por Blackie Books, que nos fala da amizade e de desfrutar o momento.





sábado, 21 de octubre de 2017

UN CURSO MÁIS: CHEGAN OS AVÓS!

Ao igual que fixeramos o curso pasado, decidimos celebrar o Día Internacional das Persoas de Idade (1 de outubro) convidándovos a vós, as avoas e os avós dos pícaros do Fogar, a que nos visitedes ao longo de outubro e novembro. Nestes encontros na biblioteca poderedes lernos contos, falarnos de como era a escola cando erades nenos, etc.

Algúns de vós xa nos visitastes ao longo desta semana, e xa puidestes desfrutar dun tempiño cos vosos netos e os seus compañeiros. Aquí vos deixamos algunhas fotos destes encontros:

Mateo, avó de Matías (6º Inf. A).





Rosa, avoa de Alba (4º Inf. A) e de...

...Inés! (6ºB de Primaria).



Mari, avoa de Diego (5º Inf. C)



Joaquín, avó de Martín (1ºB de Primaria).


Os avós e as avoas que queirades pasar un tempiño con nós, desfrutando cos vosos netos e cos seus compañeiros na Biblioteca, contándonos lendas, historias, lembranzas..., non o dubidedes!