TRABALLANDO OS CLÁSICOS: HANSEL E GRETEL

Estes días continuamos a desfrutar dos contos clásicos cos pícaros de Infantil, Así, logo de asistir hai uns días á representación de Os tres porquiños, a pasada semana, os nenos e as nenas de 5ºInf. A pasárono en grande con Hansel e Gretel, grazas a Diego Otero, a Estela, a Candela, a Pablo, a Claudia,  Diego Pereiro e a Olaia, todos eles de 5ºB. 

Este grupo de actores e actrices xeniais representou para os pícaros unha obra baseada na versión do famoso conto dos irmáns Grimm Hansel e Gretel, que Tina Meroto realizou para OQO editora. Para non perderse, desde logo, as ilustracións do álbum, creadas por Iratxe López de Munáin, das cales vos deixamos unha pequena mostra.

E, ademais, aquí vos deixamos unhas fotos da sesión:

Así de atentos seguiron os pícaros de 5ºInf. A a representación:

Finalizado o espectáculo, chegou o momento de colorear un debuxo relativo á obra que acababan de ver:

E, ademais de representar Hansel e Gretel, continuamos poñendo en escena Os tres porquiños, coa que estes días desfrutou o alumnado de 6º de Infantil. Como en semanas anteriores, os encargados de desenvolver esta actividade foron Estela, Claudia, Juan, Aitana, Pablo e Diego, todos eles de 5ºB.

E para despedirnos, aquí vos deixamos un dos mellores momentos da semana: a alegría de Uxía ao ver actuar á súa irmá Aitana na obra Os tres porquiños.

VISITAMOS VENEZUELA CON MÓNICA

A pasada semana visitounos Mónica, mamá de Christian, alumno de 3ºB, que nos levou de viaxe por Venezuela, país no que naceu e no que viviu moitos anos.

Grazas a ela percorremos as rúas da capital, Caracas; coñecemos os traxes máis típicos, como o liquiliqui; contemplamos as fermosas praias venezolanas, como Cayo de Agua ou Playa Medina; nos abraiamos co Salto Ángel, o salto de auga máis alto do mundo; e falamos do deporte nacional: o béisbol.

E por se todo isto fose pouco, puidemos degustar estas delicias tipicamente venezolanas que nos preparou...

Porén, aínda que todo isto nos encantou, o momento que máis nos emocionou foi cando nos falou da súa cidade, Barquisimeto, a cuarta máis poboada de Venezuela. Aquí vos deixamos algunhas fotos  de Barquisimeto e dos lugares e edificios máis representativos da cidade, dos que nos falou...

Vista xeral da cidade

Catedral Metropolitana

Obelisco

Centro Cultural Flor de Venezuela

Moitas grazas, Mónica, por todo o que nos ensinaches e polo bo humor co que o fixeches.

CON CANDELA, INÉS E ISABEL COÑECEMOS A... JANE GOODALL

Candela e Inés, alumnas de 6ºB, volveron para achegarnos a unha nova muller xenial, a naturalista, activista e primatóloga Jane Goodall. E nesta ocasión fixérono coa axuda da súa compañeira Isabel.

Candela, Inés e Isabel realizaron para o alumnado de 2ºB de Primaria unha pequena obra de teatro baseada no álbum Yo, Jane (Océano), no que o seu autor, Patrick McDonnell, nos conta a historia de Jane, unha nena inglesa nada no seo dunha familia con escasos recursos, que soña con ir a África para coñecer os animais que ten visto nos libros. Coa axuda da súa imaxinación, a nena consegue viaxar até ese fermoso continente, sen sospeitar que, co paso do tempo, o seu soño se vai facer realidade. Esa nena non é outra que Jane Goodall, unha das mulleres de ciencia máis queridas e respeitadas na actualidade, que entregou a súa vida ao estudo dos chimpancés africanos e ao fomento do amor pola natureza.

Aquí vos deixamos unhas fotos da sesión, na que estas tres actrices e contacontos xeniais, con moitas actucións ás súas costas na biblioteca do Fogar, ademais de representar a obra, tamén explicaron ao público como comezaron a realizar contacontos na biblio, cales foron as súas razóns para centrar as súas sesións en dar a coñecer grandes mulleres, etc. 

E desde aquí vos animamos a achegarvos a unha figura como Jane Goodall, un verdadeiro exemplo de xenerosidade e de amor pola natureza.

GuardarGuardar
GuardarGuardar

UNHA TARDE CO GRILO MÍLLELO... E COA SÚA AUTORA

Este xoves, os pícaros de 5º B e C de Infantil viviron un momento moi especial na súa visita semanal á biblioteca. Todos eles desfrutaron co álbum O grilo Míllelo, publicado por Edicións Embora, e, para lerllo, ninguén mellor que a súa autora: Icía Varela Gómez, estudante de 2º de Bacharelato no noso colexio.

Icía, primeiro, leu este divertido conto para as nenas e os nenos:

Despois, e xa que no álbum aparecen distintos insectos, decidiu averiguar canto sabía de insectos o público asistente, para o cal se serviu de diferentes libros da nosa biblioteca. Así repasamos o marabilloso mundo das abellas, das cascudas, das moscas, das bolboretas...

Para rematar a sesión, Icía, decidiu cantarnos a canción do Grilo Míllelo, interpretando a melodía creada para o álbum:

Aos que aínda non coñezades este libro, escrito por Icía Varela Gómez e por Xosé Manuel Varela, e ilustrado por Xosé Tomás, vos recomendamos que pasedes pola biblioteca a lelo.

E para despedirnos, aquí vos deixamos unha mostra da outra faceta da vida de Icía: a música. Sen dúbida desfrutaredes escoitando esta voz que os afeccionados a Bamboleo, da TVG, coñecerán logo do seu paso por este programa. Aquí tedes o seu último vídeo, dirixido por outro dos alumnos do Fogar, Diego Pampín, e no que aparecen diferentes estudantes do noso colexio.

GuardarGuardarGuardarGuardar
GuardarGuardar

ACHEGÁNDONOS AO CARNAVAL CON 5ºB

Este trimestre, en 5ºB, continuaremos a traballar no proxecto "UN FOGAR DE PAÍSES", e logo de investigar sobre Venezuela, agora nos imos centrar no Brasil. O tema fundamental sobre o que imos procurar información vai ser: o carnaval no Brasil. Mais antes de comezar, decidimos ollar para a nosa terra e investigar sobre o noso Entroido, tarefa á que se dedicaron Candela, Aitana, Bárbara, Estela e Olaia. Este grupo de investigadoras nos achegou ás principais características do Entroido, como as comidas máis típicas ou as figuras máis características.

Así, este paseo polos lugares fundamentais do Entroido, como Verín, Xinzo ou Laza, nos permitiu coñecer personaxes que nos abraiaron, como os Peliqueiros, os Cigarróns ou as Pantallas. Aquí vos deixamos unha mostra dos que máis nos chamaron a atención:

Cigarróns de Verín

Peliqueiros de Laza

Pantallas de Xinzo de Limia

Boteiros de Viana do Bolo

Xenerais do Ulla

E logo de percorrer o noso Entroido, fixemos unha primeira achega ao Carnaval do Brasil, a través dunha das súas principais características: o baile. Aitana, Candela, Estela, Olaia, Claudia e Inés, como se de auténticas bailarinas dunha escola de samba se tratase, danzaron ante os seus compañeiros nun anticipo dunha sesión que terá lugar proximamente, momento no que as mamás de tres dos alumnos deste grupo, Ángelo, Emily e Daniel, todas elas nadas no Brasil, visitarán o Fogar para achegarnos ao Carnaval do Brasil.