HOXE FALAMOS DE LIBROS CON... ANA MARTÍNEZ

Logo de falar de libros con Cristina Prego Fraga, hoxe traemos a outra apaixonada da lectura: a nosa compañeira Ana Martínez, profesora de 1º de Primaria e unha verdadeira experta en contos para traballar as emocións. Non perdades os títulos que nos recomenda: entre eles atoparedes poesía, misterio, álbum ilustrado..., e algunhas das autoras que máis nos gustan, como Érica Esmorís ou Gloria Fuertes. Aquí vos deixamos con Ana:

1.O libro da túa infancia… 

Recordo andar sempre cun libro de Candy Candy na man, ata durmía con el.

O misterio das badaladas de Xabier Docampo foi un libro que me marcou moito de nena.

Poemas de la Oca Loca e ¡Viva el mundo al revés! de Gloria Fuertes.

 

2.Cales son os xéneros que máis che fan desfrutar? 

Gústanme especialmente os contos e a literatura infantil. Contos que serven para traballar diferentes emocións ou situación cos máis pequenos e pequenas.

Gústanme moito a narrativa de Elsa Punset e os seus contos para nenos. Tamén Dolores Redondo coas súas novelas de intriga e misterio. Tamén a novela romántica.  

 

3.Se puideses coñecer a un escritor ou escritora, a quen escollerías? 

Encantaríame coñecer a Gloria Fuertes e Paula Carballeira. A primeira por ser unha autora que me encanta e a través da que aprendín a rimar. E a segunda porque é unha contacontos estupenda e as súas historias son súper amenas e divertidas.

 

4.O teu libro favorito… 

Libros favoritos teño moitos, sobre todo contos para ler aos nenos.

Así es la vida de Ana-Luisa Ramírez e Carmen Ramírez.

Adiviña canto te quero de Sam McBratney.

Contos para nenos que dormen deseguida de Pinto e Chinto.

Poemas de la Oca Loca de Gloria Fuertes.

 

5.Se tiveses o poder de converterte nunha personaxe literaria, cal elixirías? 

Gustaríame ser Amabel, a protagonista do libro El poder de Amabel de Érica Esmorís.

Gústame porque nos ensina que todos temos un superpoder, só temos que atopalo.

 

6.Unha obra para tremer de medo… 

Trilogía de Baztán de Dolores Redondo. Tras o achado dun cadáver seguimos as pistas para descubrir o culpable dos homicidios que se van sucedendo.

 

7.Un libro para escachar co riso… 

A toupiña que quería saber quen lle fixera aquilo na cabeza! de Werner Holzwarth.

 

8.Que supón para ti a lectura dun libro?

Unha aventura nova para descubrir e coa que pasar un bo momento dedicado a un mesmo.

 

9.Lectura en papel ou dixital?

Prefiro a lectura en papel e saber canto falta para rematar.

 

10.Para despedirnos, uns versos ou un pequeno fragmento que leras nalgún libro e que che gustase especialmente:

Si esos dos no se hubieran llevado tan bien…

Yo no sería quien soy.

Había una única posibilidad entre millones de que todo ocurriera así…

Pensándolo bien:

¡Que suerte la mía!

                (¡Qué suerte la mía!, de Sandrine Beau)