ACHEGÁMONOS AO TRABALLO DUN INSPECTOR DE POLICÍA CON 1ºB DE PRIMARIA

Dentro do proxecto destinado a traballar as profesións, o grupo de 1ºB de Primaria volveu recibir unha visita. Neste caso foi Santiago, inspector da policía e papá de Gonzalo, quen nos regalou o seu tempo e pasou pola biblioteca para falarnos do seu traballo.

Santiago nos contou en que consiste o labor dun policía, nos describiu as diferentes especialidades que existen dentro da Policía Nacional,  e nos explicou cal é a súa función dentro da Policía Xudicial. Foron tantas as cousas interesantes que nos contou, que Gonzalo e os seus compañeiros de 1ºB non puideron deixar de facer preguntas sobre todo o que nos explicaba Santiago. E de todo canto nos dixo, queremos destacar o importante que é facer un uso responsable de Internet, accedendo só a contidos adecuados para a nosa idade e sempre coa supervisión de papá ou mamá.

Desde aquí, queremos dar as grazas a Santiago por explicarnos en que consiste o labor dun policía e, ademais, por facelo dunha maneira tan divertida e educativa.

DESPEGAN OS LIBROS VIAXEIROS

Érase unha vez... uns libros que querían ver mundo. Por iso, decidiron saír da biblioteca e iniciar unha viaxe polas casas dos nenos e das nenas do Fogar.

Así foi como hai uns días deu comezo a actividade dos "LIBROS VIAXEIROS", grazas á cal os pícaros de Gardería e de 4º de Infantil irán levando para os seus fogares unhas bolsas cheas de historias, que poderán desfrutar nas súas casas durante uns días. 

Os nenos e as nenas de Gardería non quixeron perder o tempo e, nada máis ver as bolsas de libros, comezaron a inspeccionalas.

Nas aulas de 4º de Infantil, tamén recibiron con alegría e curiosidade estas bolsas cheas de sorpresas, que viaxarán até as casas coa axuda das mamás e dos papás.

Nestes libros tan viaxeiros, hai historias tan divertidas como o xa  clásico A vaca que puxo un ovo, ou a súa continuación, titulada Primeira semana na escola das vacas, as dúas publicadas pola editorial Patas de Peixe.

               

                                          

Tamén hai libros que nos axudarán a ir medrando e superando eses pequenos medos que podemos ter, como Todo lo que sé de la caca (Combel), ¡Fuera pañales! (Combel), Iago ten un pesadelo (Tambre) ou ¡Sin chupete! (Combel).

                    

                 

E, por suposto, libro-discos que nos farán viaxar e bailar, como Lucecús, de Pirilampo; Pakolas, de Paco Cerdeira; Eu cociño, ti cociñas?,de Mama Cabra; ou As que máis molan!!!, de María Fumaça; todos eles da colección Sonárbore, da editorial Galaxia. Aquí vos deixamos "Eu teño alguén", unha das nosas cancións favoritas do libro-disco de María Fumaça As que que máis molan!!!, incluída tamén no seu  libro-cd-dvd Xiqui Xoque Fiú Fiú:

Agardamos que estes libros viaxeiros vos fagan pasar a vós, os pícaros do Fogar, as mamás e os papás, momentos agradables e divertidos en familia.

E, por suposto, queremos destacar que esta actividade, ao igual que moitas outras, non sería posible sen o traballo xeneroso do equipo de axudantes de biblioteca. 

BOTA A ANDAR O CLUB DE LECTURA DE BANDA DESEÑADA

Este curso botou a andar o Club de Banda Deseñada do Fogar, no que os estudantes de Secundaria que así o desexen poderán achegarse a un mundo tan apaixonante como o do cómic. Guiados por Brais Rodríguez, profesor de Educación Plástica, Visual e Audiovisual no noso colexio, e gañador de galardóns tan importantes como o VI Premio Castelao de Banda Deseñada da Deputación da Coruña 2010, trataremos de concederlle especial protagonismo á banda deseñada galega, deténdonos polo miúdo no papel da muller dentro deste ámbito.

Ademais das reunións periódicas na biblioteca, cada trimestre recibiremos a visita dunha ilustradora galega, cuxa obra traballaremos previamente. Neste 1º trimestre, visitaranos a ilustradora coruñesa Bea Lema, primeira muller gañadora do prestixioso Premio Castelao de Banda Deseñada da Deputación da Coruña.

O vindeiro venres 30 de novembro, ás 11h., terá lugar na biblioteca a segunda reunión do Club de Banda Deseñada, na que nos deteremos na obra de Bea Lema, como paso previo para recibir a súa visita. O encontro con Bea terá lugar o martes 11 de decembro, ás 14h., tamén na biblioteca do colexio.

NAVEGAMOS POLO TRABALLO DUN XEFE DE MÁQUINAS CON FRAN E OS PÍCAROS DE 1ºA DE PRIMARIA

Dentro do proxecto sobre as profesións, continuamos a recibir visitas de traballadores de distintos campos. Entre eles, queremos destacar o encontro con Fran, papá de Sofía, que pasou pola biblioteca para falarnos do seu traballo como xefe de máquinas dun barco remolcador. Con el, Sofía e os seus compañeiros de 1ºA de Primaria se mergullaron na vida no mar e aprenderon infinidade de cousas sobre os barcos. Fran explicounos como funcionan os barcos, falounos da maquinaria que os compón e nos amosou o importante que é o bo mantemento desta. Neste labor de mantemento da maquinaria dos barcos resulta fundamental hoxe en día o emprego de robots que, dirixidos por persoas como Fran, logran chegar até as partes máis inaccesibles das embarcacións para arranxar as avarías. Os nenos e as nenas de 1ºA ficaron abraiados cos videos que Fran nos amosou, nos que todos puidemos observar o traballo dun destes robots.

Outro dos momentos que máis nos impactou a todos foi cando Fran nos explicou outro dos importantes labores que fan el e os seus compañeiros do remolcador: apagar os incendios que poidan xurdir noutros barcos. Todos quedamos abraiados escoitando como nos describía eses momentos e vendo as fotografías que nos amosou.

Queremos dar as grazas a Fran por ensinarnos tantas cousas e por achegarnos a un mundo tan apaixonante como o do mar. E todos aqueles que nos queirades visitar para falarnos dos vosas profesións, aquí estamos a agardar por vós!

ACHEGÁMONOS AO TRABALLO DUN TÉCNICO DE SEGURIDADE CON SINDO E OS PÍCAROS DE 1ºB DE PRIMARIA

Como sabedes, este curso estamos a mergullarnos no mundo das profesións, polo que están a visitar o colexio persoas que traballan en diferentes eidos. Onte tivemos o pracer de recibir a Sindo, pai de Claudia, alumna de 1ºB de Primaria, que nos ensinou en que consiste o seu traballo como técnico de seguridade dunha empresa de construción.

No encontro con Claudia e cos seus compañeiros de grupo, Sindo amosounos os distintos elementos que compoñen o seu uniforme de traballo, explicounos o importante que é manter as medidas de seguridade axeitadas nun ámbito como o seu, e confesounos a súa máxima: "que todos os traballadores desenvolvan o seu labor seguros e que volvan para as súas casas tal e como chegaron ao traballo".

Sen dúbida, os pícaros desfrutaron coas fotos que nos amosou Sindo, e tamén co relato dunha persoa que traballa na construción de casas, ferrocarrís, aeroportos, estradas e mesmo bibliotecas. Un momento que nos impactou foi cando Sindo nos ensinou como é traballar na contrución dunha ponte a 60 metros de altura. 

Desde aquí queremos dar as grazas a Sindo por regalarnos o seu tempo e por ensinarnos tantas cousas sobre o seu traballo.

UN PETISCO DE OUTONO E ALGO DE SAMAÍN

Nuns días nos que andamos a traballar o outono, queremos felicitar ao grupo formado por Daniela, Lucía Salguero, Lucía Otero, Ainara, Carla e Paula, de 5º de Primaria, que fixeron desfrutar aos pícaros de 4º de Infantil co fermoso conto El árbol que no tenía hojas, na versión de Fernando Alonso publicada por Santillana.

Así de atento estaba o público cando as actrices saíron a escena:

E comezou o espectáculo:

Sen dúbida, unhas actrices de 10!

Mais nestas semanas que acaban de pasar, non só respiramos aires de outono, senón tamén do Samaín. Así, a biblioteca encheuse de monstros, bruxas e mesmo esqueletos tan terrorificamente fermosos como estes de 6ºInf. A.

E, por suposto, nunha época coma esta, non podían faltar os contos de medo. Esta foi a temática principal das historias que vimos de desfrutar estes días na biblioteca cos pequenos. Un dos que sempre fai divertirse aos pícaros é un clásico da biblioteca do Fogar: A figueira de Pelostortos, un relato tradicional español adaptado pola coñecida contacontos Ana García Castellano para a editorial OQO, cunhas impresionantes ilustracións creadas polo artista bilbaíno Mikel Mardones.

                                                     

Os pícaros de 5º de Infantil foron uns dos que desfrutaron con este conto de medo con final feliz. E logo de escoitalo, tiveron que realizar unha importante misión: colorear a Pelostortos e poñerlle pelo, pois do susto que apañou ao final do libro quedou branco e sen un só pelo na cabeza.

Como vedes nas fotos, algunhas destas sesións cos pequenos se desenvolveron coa axuda de estudantes de 6º de Primaria e de 1º da ESO.

Outro dos contos cos que rimos e, á vez, pasamos un pouco de medo foi Tío Lobo, un conto popular italiano adaptado para Kalandraka por Xosé Ballesteros, con ilustracións de Roger Olmos.

Claudia e Miriam, alumnas de 6ºC de Primaria, quixeron agasallar á súa antiga profesora, Tina, lendo este conto para o seu actual grupo: 1ºC de Primaria.

A lectura deste álbum permitiu a Claudia e a Miriam reflexionar cos pícaros sobre un tema moi presente no libro: a mentira.

ACHEGÁNDONOS AO MUNDO DA FARMACIA CON IRIA E OS PÍCAROS DE 4ºA DE PRIMARIA

Dentro do proxecto central deste curso, destinado a traballar as profesións, estamos a recibir visitas de persoas relacionadas con diferentes sectores profesionais. En 4º de Primaria estamos a centrarnos nas profesións pertencentes ao sector sanitario. Para axudarnos, esta semana pasou pola biblioteca Iria, antiga alumna do noso colexio e actualmente estudante de Farmacia e Parafarmacia. Iria, irmá de Saúl, alumno de 4ºA de Primaria, mantivo un encontro co seu irmán e cos seus compañeiros de grupo, no que falou, precisamente, deste mundo que lle apaixona: o da farmacia.

Con ela aprendemos, por exemplo, como é o mundo dos laboratorios, como se elaboran os medicamentos ou como debemos reaccionar diante dun incendio. Ademais, con Iria asistimos a un interesantísimo curso de primeiros auxilios:

Desde aquí queremos agradecer a Iria a súa amabilidade e paciencia ao responder as mil e unha preguntas que lle formularon os pícaros de 4ºA. E a aqueles que queirades participar no proxecto, vos convidamos a visitarnos para falarnos da vosa profesión.

E LOGO QUE É ISO DA CONCIENCIA?

Entre os diferentes contos aos que nos achegamos a pasada semana, queremos destacar un: La vocecita, un divertido álbum ilustrado protagonizado por Perico, un entrañable camaleón que nos fixo desfrutar a todos coa súa aventura/desventura, e que nos permitiu falar cos pícaros sobre que é iso da conciencia.

Neste conto atopámonos con Perico, que logo de comer moi ben, se sentou a descansar e a tomar o sol. Nese momento aconteceu unha cousa: lle entraron ganas de facer caca. Perico ollou ao seu redor na procura dun lugar axeitado e, logo de moito buscar, encontrou unha árbore tras a que agocharse a facer tal operación. Este é o punto de partida dunha historia humorística e escatolóxica, que permite ensinar aos pícaros normas de hixiene e de respecto aos demais e ás propiedades dos outros, ademais de facernos reflexionar sobre a necesidade de emendar os erros que poidamos cometer.

E como os camaleóns poden acadar moitas cores, logo de escoitar o conto e de falar sobre os temas fundamentais do mesmo, nos puxemos a pintar a Perico:

A todos os que queirades pasar un bo momento desfrutando dunha lectura chea de humor, vos recomendamos esta obra da editorial Kókinos, escrita por Michael Escoffier e ilustrada por Kris Di Giacomo.