ENTREVISTAS XORNALÍSTICAS 1ºESO

 

Antonio Fondo, un galego viaxeiro polo mundo

 

Antonio é profesor de Secundaria, voluntario de Cáritas e de cando en vez colabora con algún blog ou con algún xornal.

 

ENRIQUE MERA ESTRAVIZ (1º ESO A)

 

Como se chaman os blogs cos que colabora?

cazatesouros.blogspot.com e ofarodesofía.blogspot.com

 

Cal é a temática destes blogs?

Estos dous blogs versan sobre diferentes temas culturais vinculados co noso instituto (Eusebio da Guarda). Tócanse temas tan variados como: música, literatura, viaxes e no caso ofarodesofía.blogspot.com tamén é voceiro da nosa biblioteca.

 

Que tipo de escritos fai?

A min gústanme os descritivos, os que describen a paisaxe mesturando coa emoción e o sentimento. Intento transmitir paisaxes sublimes da nosa terra.

 

Á parte disto usa algún outro xénero literario?

Co motivo da pandemia e o confinamento demos cabida ao xénero da entrevista titulado: “Os rostros da crise”. Nesta sección fómoslle dando voz aos diferentes profesionais e demais persoas que estaban en primeira liña.

 

A que profesionais ían dirixidos estas entrevistas?

Antonio, un camionero de rutas internacionais. Julia, unha enfermeira en Canarias. Lorena, Manuel e Raquel, traballadores dos supermercados. Miluca e Lola, voluntarias de Cáritas. Irma Macías, vocalista de Luar na Lubre, dándolle voz ao mundo musical. Estas entrevistas están recollidas en ofarodesofía.blogspot.com.

 

Algún outro escrito que destaque polo seu simbolismo para vostede?

Algún de tipo autobiografico publicado en La Voz de Galicia, edición de Carballo, e outros sobre as romarías e festas ao longo dos tempos para un especial das festas de Vimianzo (agosto no ano 2018)

 

Ten participado nalgunha outra tarefa relacionada co mundo editorial?

Teño participado na edición e na organización de diferentes xornadas e congresos da AGH (Asociación Galega de Historiadores) e tamén da Archicofradía do Apóstolo Santiago. Tamén participei no servizo de documentación e redación da revista de ámbito xacobeo Compostela dende o 1993 ata o 2014.

 

É certo que lle gusta viaxar?

Si, e sobre todo organizar estas viaxes. Nos blogs hai varios materiais destas viaxes pola xeografía galega, española, tanto co alumnado como co profesorado.

 

Como concibe as viaxes?

As viaxes deben ser un cúmulo de experiencias culturais e de convivencia.

 

Dos autores galegos hai algún que o inspire?

Para o Courel, Uxío Novoneira. Para Celanova, Manuel Curros e Celso Emilio Ferreiro. Para Padrón, Curros e Rosalía de Castro. Para Mondoñedo, Cunqueiro. E para Galicia en xeral, Ramón Otero Pedrayo, un dos grandes referentes na análise do territorio galego.

 

Cóntenos unha viaxe ao estranxeiro?

No ano 2017 fixemos un tour por Italia cuns amigos.

 

Que foi o que máis lle impresionou?

Gustoume todo. Como sensacións diferentes citarei o Pozo de Orvieto, feito cunha rampla para baixar e outra para subir, incluso con montura. Tamén desfrutamos dun baño tropical no lago di Garda.

 

En viaxes por España pode contar algunha anécdota curiosa?

Nunha viaxe con familiares e amigos no verán estivemos na vila de Don Álvaro preto de Mérida; e chamoume moito a atención unha iniciativa cultural que consistía na proxección de cine no río Guadiana.

 

Teño entendido que tamén lle gustan os percorridos culinarios. Pode compartir algún interesante?

Nunha ocasión, estando por Asturias cuns amigos, despois de visitar a cova rupestre de El Buxu, tomamos camiño cara a Tielve para desfrutar unha señora fabada, uns tortus de mazá con queixo de Cabrales. Todo isto no medio dos Picos de Europa.

 

Que opinan as súas amizades desta faceta súa?

Moitos solicitan a miña modesta colaboración para organizar viaxes e buscar aloxamento. Tamén me teñen plantexado a posibilidade de facer unha guía turística.