DIRECTO DESDE AS MONTAÑAS DO COUREL, CHEGOU O APALPADOR!

Onte, os pícaros de Infantil desfrutaron dunha visita moi especial: a do Apalpador. Tal e como nos contou, estando el na súa terra, as montañas do Courel, escoitou falar do bos que son os nenos e as nenas do Fogar e, por esta razón, quixo vir coñecelos.  E así, unha por unha, este simpático castañeiro foi percorrendo as diferentes clases, parolando cos rapaces e deixando en cada unha un agasallo moi doce para os pícaros.

O Apalpador comezou visitando as clases de 4º de Infantil, como a dos Natalitos:

Tamén charlou cos Iriños:

E cos Jesusitos:

Logo, o Apalpador detívose a falar cos rapaces de 5º de Infantil, como os Cristinitos:

Tamén os Lolitos puideron conversar co Apalpador e contarlle que agasallos van pedir polo Nadal:

E os Mariachis conquistaron ao Apalpador cando, ao entrar este na súa clase, observou que estaban coloreando debuxos seus:

Por último, o Apalpador visitou as clases de 6º de Infantil, comezando polos Puritos:

Logo detívose cos Gemitos:

E rematou cos Caritos:

Desde aquí queremos dar as grazas ao Apalpador polo cariño e simpatía que amosou cara a todos nós, e tamén a Alejandro, papá de Miriam, alumna de 6ºA de Infantil, por falarlle ao seu amigo castañeiro dos pícaros do Fogar e conseguir que nos visitase.

CLUB DE BANDA DESEÑADA: ENCONTRO CON MANEL CRÁNEO

Onte, no Club de Banda Deseñada, tivemos o pracer de recibir a visita dun dos nosos artistas favoritos, o coruñés Manel Cráneo, co que mantivemos un encontro-xantar no que nos achegamos ás súas facetas de ilustrador e de editor.

Así, hai varias semanas comezamos a achegarnos ao seu traballo, lendo e comentando as súas obras:

Entre as que máis nos gustaron, sen dúbida, está Destino Herguss, unha apaixonante novela gráfica de ciencia-ficción, con grandes doses de acción, misterio, aventura, humor e crítica social, que nos descubriu un universo sorprendente creado por Cráneo: o Planeta Mincha.

Ademais de achegarnos ás súas obras, durante estas semanas nos mergullamos tamén no seu proxecto Demo Editorial, o principal referente dentro da edición de banda deseñada en lingua galega, e que a día de hoxe conta entre o seu catálogo con obras de autores da categoría de David Rubín, de Inacio Vilariño, de Jano, de Tokio ou do propio Manel Cráneo.

E por fin chegou o momento tan desexado: o encontro con Cráneo. Un encontro que só podemos definir como extraordinario, e no que desfrutamos desde o primeiro minuto. Entre petiscos, tortilla e empanada, Cráneo falounos do seu labor como artista gráfico, dos seus inicios neste eido, das súas diferentes obras, do proceso creativo, do seu proxecto editorial, do traballo dun editor, da situación actual da banda deseñada galega, e de mil e unha cousas máis, nunha conversa na que Manel, un dos grandes do cómic galego, destacou pola súa humildade e cercanía.

Desde o Club de Banda Deseñada queremos darche as grazas, Manel, por todo o que nos ensinaches na tarde de onte e por todo o respecto e cariño que amosaches cara ao traballo dos rapaces. Queda pendente a visita ás instalacións de Demo Editorial, experiencia da que desfrutaremos no segundo trimestre.

E todos aqueles que desexedes coñecer algo máis sobre Cráneo e sobre o seu proxecto editorial, non tedes máis que picar aquí.

NATALIA REGRESA Á SÚA CASA E AS AVOAS E OS AVÓS SEGUEN A VISITAR A BIBLIOTECA

Hai ocasións nas que temos a sorte de recibir unhas visitas moi especiais, como cando regresan á súa casa algúns dos nosos exalumnos. Esta semana puidemos desfrutar dun tempiño con Natalia, que nos regalou a súa tarde e nos leu Artur e Clementina (Kalandraka), o célebre álbum creado por Adela Turin e Nella Bosnia. Natalia escolleu esta obra para tratar cos pícaros de 6ºA e 6ºB de Infantil un tema fundamental: a igualdade.

Esta obra, que reivindica o rol feminino na sociedade, combate os estereótipos sexistas e denuncia a discriminación, segue a resultar fundamental hoxe en día.

E logo da lectura, chegou o momento de falar sobre ela:

As visitas non se detiveron aí, pois as avoas e os avós continúan a pasar pola biblioteca para coñecela e para ensinarnos moitas cousas. Estes días os nenos e as nenas de 1ºA de Primaria tiveron o pracer de compartir un tempo con Ángeles e Manolo, avós de María. Con eles aprendemos moitas cousas sobre a nosa cidade, sobre os diferentes barrios e sobre como foi cambiando A Coruña co paso dos anos. Un percorrido turístico realizado grazas a dous guías, Manolo e Ángeles, aos que só podemos definir como espectaculares.

En 1ºA tamén puideron desfrutar dun tempiño marabilloso con outra avoa xenial, Carmen, avoa de Carmen, que foi respondendo as mil e unha preguntas que os pícaros lle foron realizando. A Carmen lle agradecemos a súa paciencia e cercanía cos pequenos.

E, por suposto, queremos dar as grazas a todos os que nos estades a visitar por todo o que nos ensinades e polo ben que nolo facedes pasar.

CLUB DE BANDA DESEÑADA: PREPARANDO A VISITA DE MANEL CRÁNEO

Esta mañá comezamos a achegarnos á obra de Manel Cráneo, unha das figuras máis destacadas da banda deseñada galega, cuxas creacións apareceron en publicacións como BD Banda, Barsowia, Ovo, Costra de Postre, Bravú ou Subterfuge Comics, e que nos visitará o 17 de decembro.

Os compoñentes do Club de Banda Deseñada xuntámonos durante o recreo para desfrutar con algúns dos seus cómics, como Os lobos de Moeche, A torre dos Mouros, Cousas de Mortos ou DestiNo HeRgus, todos eles publicados por Demo Editorial.

Todos aqueles que desexedes levar en préstamo estes cómics non tedes máis que pasar pola biblio.

Esta apaixonante obra nos achega ás famosas Revoltas Irmandiñas, nas que os campesiños galegos derrocaron máis de 140 fortalezas en Galicia nunha loita contra o poder establecido e os abusos dos señores feudais.

                                                                                                                            

                         

Cómic baseado nos  achádegos e hipóteses da escavación desenvolvida no 2012 por un grupo de arqueólogos e científicos do CSIC no monte de Lira, en Carnota, nunha misteriosa fortaleza localizada no contexto altomedieval. Esta pequena aventura sérvenos para coñecer como se vivía na Costa da Morte nos séculos IX e X, nun momento en que Compostela era obxectivo de normandos e musulmáns.

Nesta obra desfrutaredes con relatos cheos de humor negro, acedo e irónico, protagonizados todos eles por esqueletos que reflexionan sobre o mundo e a sociedade. Estamos perante unha viaxe por outros mundos paralelos ao noso, habitados polos que viviron nel antes que nós.

Primeira novela gráfica ambientada no Planeta Mincha (proxecto multidisciplinar de Manel Cráneo), que nos presenta unha aventura con altas doses de intriga, acción, misterio, humor e crítica social, protagonizada por Tombo e Pichuk, dous tipos moi diferentes que coinciden nunha misteriosa misión que os levará até unha das rexións máis perigosas do planeta.

Desde aquí vos convidamos a que vos mergulledes na obra de Cráneo e tamén no seu proxecto Demo Editorial, unha das editoras máis interesantes da banda deseñada galega actual.