O UNIVERSO NA BIBLIOTECA

O doce de abril de 1961, o cosmonauta Iuri Gagarin, a bordo da nave Vostok 1, converteuse no primeiro ser humano en viaxar ao espazo exterior. Comezaba así a era espacial, que levaría ao home a pisar a Lúa o 20 de xullo de 1969. Se che interesa coñecer máis acerca das viaxes do home a través do espazo, se tes curiosidade por saber como nace unha estrela ou que é un burato negro, vente pola biblioteca a desfrutar da nosa maravillosa selección de libros de consulta sobre esta temática.

Ademais, a relación do home co espazo, baixo a forma de emocionantes viaxes interestelares, de  terroríficas invasións alieníxenas ou da colonización por parte do home de lonxanos planetas, ocupou xa desde os afastados tempos de Verne, a imaxinación de numerosos escritores que nos regalaron obras de ficción tan emocionantes como A guerra dos mundos ou tan divertidas como Sen noticias de Gurb. Na biblioteca do Fogar contamos con algunhas das mellores obras relacionadas con esta temática. Vennos visitar e desfruta con todas as aventuras que conteñen as súas páxinas!

Aquí vos deixamos unha pequena mostra dos libros que podedes encontrar:

	Una estrella para Peque Coehete (primeiros lectores): "¡Tú eres mi ESTRELLA!" Este é o grito de alegría co que finaliza este estupendo conto sobre unha aventura espacial. As páxinas deste libro permitirannos descubrir a gran ilusión do protagonista, Peque Cohete, que non é outra que regalarlle unha estrela a Papá Cohete. Nin Celeste Satélite, nin Tina, a nave do espazo, nin Néstor, o astronauta, nin ninguén será quen de facelo desistir no seu empeño por alcanzar unha estrela brillante coa que felicitar o aniversario a Papá Cohete. E así, Peque Cohete, viaxará até a Lúa, mais, xusto cando está a piques de coller unha estrela, o seu amigo Zodi Galáctico ten un problema importante. Nese momento, Peque Cohete terá que tomar unha decisión. Este libro de Julie Sykes é un auténtico canto á amizade, que fará desfrutar aos máis pequenos.
	Medianoche en la Luna (a partir de 7 anos): Mary Pope Osborne agasállanos neste libro cunha nova aventura dos irmáns Jack e Annie, que continuan aquí na procura dos catro obxectos que os permitirán liberar a Morgana, a dona da casa máxica da árbore, dun terrible feitizo. Logo de encontrar tres destes obxectos, tan só lles queda dar co último, para o cal deberán levar a súa busca até a mesmísima Lúa.
	Tintín. Objetivo: la Luna (a partir de 7 anos): Nesta nova aventura dunha das personaxes máis coñecidas da banda deseñada, Tintín e o capitán Haddock viaxan a Syldavia para encontrarse co profesor Tornasol. Alí descobren que o profesor se atopa traballando nunha planta secreta de investigación atómica no corazón do macizo montañoso de Zmylpathes, contratado polo goberno syldabo para dirixir a construción dun cohete que sirva para realizar a primeira viaxe tripulada á Lúa. A partir de aquí asistiremos a diferentes aventuras, como o adestramento de Tíntín como astronauta ou o complot ao que se terán que enfrontar, aparentemente dirixido pola veciña Borduria, que pretende sabotear o proxecto. ¿Conseguirá, finalmente, o cohete despegar cara ao seu destino?
	Historias secretas do espacio (a partir de 10 anos): ¿Non resulta un enorme pracer escoitar ás agachadas historias interesantes sen que a persoa que as está a contar se decate de que o estás a escoitar? Isto é precisamente o que viviremos neste libro de Joan Manuel Gisbert, grazas á personaxe de Thomas. Na pousada das montañas suizas que posúe o seu pai, reúnense de incógnito unha vez ao ano tres veteranos astronautas, coa fin de lembrar as súas experiencias máis secretas e emocionantes no espazo. Isto é o que permitirá a Thomas coñecer, sen ser descoberto, historias tan fascinantes como "O misterio das voces do espazo", "O estraño caso do Laboratorio 4" ou "O máis fermoso do mundo". Se vós tamén as queredes coñecer, só tedes que vos mergullar nas páxinas deste apaixonante libro, que está a agardar por vós na biblioteca.
	Zack Galaxy. Una aventura intergaláctica (a partir de 12 anos): Para todo aquel que queira rir às gargalladas cun libro divertido, unha lectura ideal serán as aventuras de Zack Galaxy, un Axente Espacial Especial con sona de ser o peor policía do Sistema Intergaláctico, cuxo corpo só ten un 72'1% de humano, logo de múltiples inxertos, próteses e transplantes. Nesta obra chea de humor, Zack vese involucrado no secuestro dunha princesa nunha estación orbital cercana á Terra. Para salvala, o noso "heroe" deberá viaxar polo Universo e enfrontarse a todo tipo de criaturas. ¿Será quen de liberala?
	O Océano Galáctico (a partir de 12 anos): A obra sitúanos nun futuro lonxano no que unha nave regresa á Terra logo dunha expedición a Saturno. Nela viaxa un científico, coa súa muller e o seu fillo, que se encontrarán no espazo cun océano xigante que voa. ¿Que é este estrano océano?, ¿quen viaxa nel?, ¿qué terribles perigos traerá consigo? Se queres coñecer a resposta a estas interrogantes e desfrutar coas aventuras dos tres protagonistas, só tes que vir polo libro á biblioteca.
	Sin noticias de Gurb (a partir de 14 anos): Nesta obra enormemente divertida e chea de ironía, atopamos un extraterrestre que chega á Terra na procura do seu compañeiro Gurb, perdido no noso planeta cando se encontraba nunha misión espacial. A Barcelona preolímpica será o espazo por onde se moverá este extraño ser que, para pasar desapercibido entre os humanos, se disfrazará das celebridades máis dispares, se fartará de churros e visitará os lugares máis castizos dunha España caótica en plenos preparativos das Olimpíadas do 92. O libro serve ao autor, Eduardo Mendoza, para realizar unha crítica tan divertida como aceda da sociedade actual e do mundo que nos rodea, a través da mirada dun ser doutro planeta.
	A guerra dos mundos (a partir de 14 anos): Nesta apaixonante obra, que constitúe un dos textos pioneiros da ciencia-ficción, H. G. Wells nos sitúa perante unha dramática situación: a invasión da Terra por uns malévolos alieníxenas, que arrasan con todo co seu terrible "raio de calor", provocando o pánico ante unha humanidade que se ve impotente para detelos. Así, os marcianos conseguen facerse co control da Terra, mais ¿lograrán finalmente os humanos recuperar o seu planeta?
	Crónicas marcianas (a partir de 14 anos): Este libro está composto por unha colección de relatos que narran a colonización de Marte por parte dunha humanidade que fuxe dun mundo ao bordo da destrución. Os humanos levarán consigo ao Planeta Vermello non só as súas ganas de reproducir alí a súa antiga civilización, senón tamén enfermidades que atacarán aos marcianos e moitos dos seus medos ancestrais, que se traducen no odio ao diferente. Amosarán, deste xeito, moi pouco respecto por unha cultura misteriosa e fascinante como a que atopan, e que os marcianos intentarán protexer da rapacidade dos terrícolas. Escrita na década de 1940, a obra, que converteu ao seu autor, Ray Bradbury, nun dos mestres da ciencia-ficción, supón un canto contra o racismo, a guerra e o afán autodestrutivo do home.
	De la Tierra a la Luna (a partir de 14 anos): Esta obra, unha das máis coñecidas dun dos mellores escritores da historia, Xulio Verne, constitúe un relato cheo de emocionantes episodios coas aventuras e desventuras dos tres protagonistas do libro, que viaxan á Lúa dentro dun proxectil cilíndrico oco disparado desde a Terra por un gran canón. As peripecias dos tres aventureiros na Lúa e os descobrementos que levan a cabo alí sorprenderán a calquera lector que se mergulle nas páxinas desta trepidante novela.
	Despierta (Across the Universe I) (a partir de 14 anos): Encontrámonos aquí con Fortuna, unha nave espacial que é como un pequeno mundo. Leva moito tempo viaxando e xeracións e xeracións de tripulantes viven e morren nela, coa esperanza de que os seus fillos cheguen ao planeta prometido. Unha carga de persoas crionizadas que só espertarán ao final da viaxe. Todo está perfectamente ordeado; todo debe seguir un guión escrito de antemán. E, porén... Amy, unha rapaza de dezasete anos, esperta nun momento e un lugar que non deberían formar parte da súa vida. Elder, o futuro líder da nave, encóntrase confinado nun papel que non quere desempeñar. Ningún dos dous encaixa no gran crebacabezas da nave. E hai outra peza solta: un asasino. Desde o blog animámosvos a mergullarvos na lectura desta apaixonante obra distópica, que constitúe o primeiro volume dunha saga que se completa con outros dous títulos: Tan cerca (Across the Universe II) e Dos soles (Across the Universe III), os cales tamén podedes encontrar na biblioteca do Fogar.