UN GATO MOI LAMBÓN E UN MAR DE BÁGOAS

Esta semana continúan os contacontos na biblioteca do Fogar, nunhas sesións desenvolvidas por estudantes de 4º e 5º de Primaria para os grupos de Ed. Infantil. Entre todas as historias que nos están a visitar estes días, unha das que máis está a facer desfrutar aos pícaros é sen dúbida O gato lambón, un divertido álbum de Patacrúa e Oliveiro Dumas publicado por Kalandraka. O protagonista da obra, un gato insaciable que come todo o que se lle pon por diante, está a facer as delicias dos pequenos de 6º de Infantil grazas a Dani, Manuel, Andrea, Lucía, Osmani, Valentina, Sara e Bradley, de 5ºA de Primaria.

Tamén queremos destacar as sesións que están a levar a cabo Irene e Kalsoum, de 4ºB de Primaria, nas que andan a traballar as emocións con grupos de 4º e 5º de Infantil a través do álbum Lágrimas bajo la cama. A obra, escrita por Ana Meilán e ilustrada por Marta Mayo, fálanos da necesidade de respectar e expresar as nosas emocións.

OSOS, BOLBORETAS E UN POUCO DE SOPA VERDE COS GRUPOS DE 6º DE INFANTIL

Entre as diferentes sesións de contacontos desenvolvidas a pasada semana na biblioteca do Fogar, resultaron especialmente divertidas as vividas polo alumnado de 6º de Infantil, que puido desfrutar de historias como a do álbum Sopa verde, grazas a Fatou, Alma, Alexia, Alba, Naiala, Arantxa e Nerea, de 6ºB de Primaria.

Este grupo de contacontos xeniais non dubidou en poñer en escena este gracioso relato escrito por Angela Madeira e ilustrado Till Charlier, que podedes desfrutar en galego grazas á editorial OQO. Animámosvos a todos a achegarvos a esta obra, ideal para traballar cos pícaros os sabores e as cores, e para animalos a probar novos alimentos.

Outra destas divertidas sesións cos grupos de 6ºde Infantil estivo protagonizada por Belén e Carlota, alumnas de 4ºB de Primaria, que achegaron os pícaros a unha fermosa historia sobre a bondade e a amizade a través do álbum Oso Atrapabolboretas, escrito por Susanna Isern e ilustrado por Marjorie Pourchet.

Desde aquí recomendámosvos este entrañable conto sobre a tenra amizade que nace entre Oso e Branca, o cal tamén podedes encontrar publicado por OQO.

RISOS E SUSTOS CON CORRE CORRE, CABACIÑA

A semana pasada a biblioteca do Fogar viviu un momento máxico coa posta en escena do divertido álbum de Eva Mejuto e André Letria Corre corre, cabaciña. A adaptación teatral deste libro, convertido xa nun clásico da literatura infantil, correu a cargo dun grupo de veteranos contacontos de 5ºA de Primaria, composto por Leo, Aroa, Carolina, Manuel, Martina Labandeira, Martina Molejón, Gonzalo, Alejandra e Claudia. Este conxunto de artistas fixo desfrutar aos pícaros de 4º e 5º de Infantil coas aventuras dunha velliña que, camiño da voda da súa neta, encóntrase con tres terribles feras.

Todos o pasamos en grande co bo facer deste grupo de contacontos de 5ºA, que, logo de rematar a súa actuación, aínda tivo tempo para compartir cos pequenos un agradable momento vendo contos.

Non nos queremos despedir sen felicitar a este grupo de rapaces e rapazas de 5ºA pola súa xenerosidade e por todo o esforzo amosado durante os ensaios.

LUIS E MARÍA REGÁLANNOS UN CONTACONTOS MOI ESPECIAL

Na biblioteca do Fogar ás veces acontecen momentos máxicos, como o que vivimos a pasada semana cando a profe María e o seu fillo Luis, alumno de 3º da ESO no noso colexio, decidiron sorprender aos pícaros de 5ºA e 5ºB de Infantil cun contacontos moi especial no que leron o álbum favorito de Luis cando era pequeno: El pez Arcoiris.

Todos desfrutaron enormemente con este clásico da literatura infantil, que nos fala do valor da amizade e da xenerosidade. Desde aquí, recomendámosvos esta fermosa obra escrita e ilustrada por Marcus Pfister, e publicada por Beascoa:

E, por suposto, queremos dar as grazas a Luis por todo o cariño amosado durante a sesión cos pequenos.

FALAMOS DE ECOLOXISMO E DO PODER DA COLABORACIÓN GRAZAS AO ÁLBUM RANA DE TRES OJOS

Estes días, os pícaros de 5ºA e B de Infantil desfrutaron enormemente co álbum Rana de tres ojos grazas ao divertido contacontos que desenvolveron para eles Carmen, Noa, Enma, Lucía, Kalsoum e Chloe, alumnas de 4ºB de Primaria. 

Finalizada a representación, os pequenos agradeceron o esforzo e o bo facer das contacontos cun enorme aplauso:

E a sesión rematou cunha pequena charla arredor desta fermosa historia, que nos fala das consecuencias fatais da contaminación, da necesidade de respectar o medio ambiente e da importancia de colaborar e traballar xuntos.

Sen dúbida, recomendamos a lectura desta obra de Olga de Dios, publicada por Apila Edicións: