CONCURSO DE POESÍA POLO DÍA DO LIBRO

Un dos nosos días preferidos do ano está a piques de chegar! O vindeiro 23 de abril celébrase o Día Internacional do Libro, polo que, para festexalo decidimos propoñervos un reto: deixade voar a vosa parte máis artística e compoñede un poema, de tema e extensión libre. Logo entregádeo na biblio antes do 21 de abril e entrará a concurso no certame poético que comeza hoxe mesmo.

O MES DOS AVÓS

Un curso máis, con motivo do Día Internacional das Persoas de Idade (1 de outubro ) os avós e as avoas do alumnado de 5º e 6º de Infantil e de 1º ciclo de Primaria visitáronnos para manter un encontro co grupo dos seus netos e netas. Estes momentos xuntos serviu para que nos falasen de como era a súa infancia, de cales eran os seus xoguetes favoritos, de como era a súa escola, e ata nos leron algúns contos que nos encantaron.

Desde aquí queremos darvos as grazas ás avoas e aos avós que nos visitastes por regalarnos o voso tempo.

UN CURSO NA BIBLIO

Un curso na biblio do Fogar dá para moito: para que ti, Nico, lles ensines aos pícaros de Infantil o que é un kamishibai; para que os papás e as mamás nos visitedes para falarnos das vosas profesións; para que Noa e Enma decoredes a sala con murais inspirados nos libros que máis nos gustan; para que Isabella, Camila, Icía, Alba ou Jacobo rematedes os deberes na hora de estudo do mediodía; para que Carmen, María, Carlota ou Lucía fagades desfrutar aos pequenos cun divertido contacontos; para que Irene, Pepe, Marta, Antía, Sara, Andrea e Vera nos sorprendades cunha espectacular obra de teatro con horripilantes bruxas; ou até para que antigos alumnos como Natalia regaledes o voso tempo aos nenos e as nenas de Infantil e lles leades algúns dos seus contos favoritos.

Un curso na biblio dá para moitos bos momentos. Algúns deles volos amosamos neste vídeo co que agardamos que desfrutedes.

Un millón de grazas a todos os alumnos e alumnas que vos implicades nestas actividades e que convertides a biblio do cole nun fogar.

AGASALLOS E MÁIS AGASALLOS NA BIBLIO DO FOGAR

Estes foron uns días de agasallos na biblio do Fogar. Unha das datas que máis nos gusta é o 23 de abril, Día Internacional do Libro. Para celebralo, nesta ocasión convocamos un certame no que os nenos e as nenas de Primaria debían escribirnos algún refrán ou adiviña relacionado coa devandita temática, crear un conto ou un poema, etc. Desde aquí queremos dar as grazas aos participantes polas marabillosas creacións que elaboraron para o concurso, e tamén aos titores polo esforzo realizado. Foi moi complicado escoller os gañadores, pero, logo de intensas deliberacións, o xurado seleccionou as obras de:

Annette (1ºC)

Dani (2ºA)

Mia (3ºC)

E Liam (4ºC)

Como podedes ver nas fotos, cada un dos gañadores recibiu cadanseu agasallo como recompensa polo esforzo realizado. Pero estes non foron os únicos presentes que se deixaron caer pola biblioteca. E é que os pícaros de Infantil tamén quixeron celebrar o Día Internacional do Libro elaborando o seu propio cancioneiro. O resultado foi espectacular e a pasada semana nolo trouxeron para que todos os nenos e as nenas do cole poidan desfrutar del na biblioteca. Aquí vos deixamos o momento no que recibimos este fermoso cancioneiro:

VISITAS POLO DÍA INTERNACIONAL DA FELICIDADE NO TRABALLO (II)

Estes días acabamos coas visitas dos papás e as mamás que vos animastes a pasar pola biblio a falarnos do voso traballo. Queremos darvos as grazas a todos aqueles que nos regalastes o voso tempo. A vosa xenerosidade fixo posible que ao longo destas semanas nos puidesemos achegar de primeira man ao mundo dos oficios relacionados coa sanidade, coa educación, coa banca, coa construción, coas forzas e corpos de seguridade e, até, co mar. Precisamente neste eido traballa Recesvinto, papá de Hugo e Valeria, de 4º de Infantil, que nos visitou para explicarnos como é iso de traballar como mecánico de barco e redeiro. Con el aprendemos a arranxar unha rede e incluso a facer nós mariñeiros.

Con Rebeca, mamá de Sara (2º EPO A), experimentamos como é traballar de perruqueiro e puidemos deixar voar a nosa creatividade elaborando os nosos propios peiteados.

Sofía e Antonio, papás de Antón (2º EPO A), explicáronnos como é o seu traballo como enfermeiros na UCI e en Urxencias, e tamén nos deron unha clase práctica de reanimación. Ademais, Antonio, falounos dos traballos que desempeñou anteriormente, como buzo profesional, socorrista e monitor de natación ou masaxista.

Cris, mamá de Manu (3ºEPO B), transmitiunos a súa paixón pola docencia e lembrounos o papel fundamental que xogan as profes de Infantil no desenvolvemento dun neno. Escoitando o amor pola súa profesión que Cris reflectía en cada palabra, non dubidamos que para os seus alumnos, acudir con ela ao cole é un regalo.

Diego, papá de Dani (2ºEPO A), explicounos como é o traballo dun profesor de Educación Física e dun encargado dunha residencia de estudantes, ocupacións, ámbalas dúas, que lle encantan. Con el vimos o importante que é comprometerse co desenvolvemento persoal dos rapaces.

Pola súa banda, Ramón, papá de Alba (2ºEPO A), falounos do mundo da carpintería: dos materiais que empregan, das ferramentas más habituais neste eido, dos encargos máis habituais que reciben... E tal e como nos contou Ramón, este traballo permitiulle viaxar por medio mundo.

Con Jose, papá de Valeria, viaxamos ao longo da historia facendo un repaso polos diferentes métodos que o ser humano empregaba para comunicarse a longa distancia, desde as pombas mensaxeiras ata os actuais teléfonos móbiles. Ademais, Jose descubriunos as mil e unha cousas que fan desde as compañías de telefonía como na que traballa el.

Agradecemos tamén ao resto dos papás e mamás que neste final de curso estades a pasar pola biblio por diferentes actividades. Grazas, por exemplo, a Alejandra, mamá de Xoel, de 6º de Infantil,  por facernos desfrutar tanto con Anna Llenas e o seu álbum Topito terremoto.

E grazas tamén a Carla, mamá de Enzo, e a Thalia, mamá de Zoe, por participar no proxecto que desde 5º de Infantil están a desenvolver arredor da interculturalidade. Grazas a vós, agora xa coñecemos moitas máis cousas sobre Venezuela e Ecuador.

AS MAMÁS E OS PAPÁS VISITÁDESNOS PARA FALARNOS DO VOSO TRABALLO

O Día 1 de abril celebrouse o Día Internacional da Felicidade no Traballo. Con motivo desta data convidámosvos a vós, os papás e as mamás, a visitar a biblioteca para falarnos do voso traballo. Sodes moitos os que acepastes e, por iso, queremos darvos as grazas.

A clase de 2ºA de Primaria puido desfrutar de varios encontros grazas a persoas como Eva, mamá de Leo, que visitou a biblioteca para falarnos do importante labor que levan a cabo na Asociación Párkinson Galicia-Coruña e, tamén, de cal é a súa función dentro da mesma. Con ela, mantivemos un encontro no que, a través de diferentes probas, os nenos e as nenas puideron experimentar algunhas das sensacións e dificultades que viven no seu día a día os enfermos de Párkinson.

Pola súa banda, Óscar, papá de Julia, tamén de 2ºA, amosounos todos os traballos que pode desempeñar un enxeñeiro de montes. Con el coñecemos, por exemplo, o labor fundamental que levan a cabo os membros das brigadas de prevención de incendios, o traballo que desenvolven no Centro CIUDEN Vivero ou como é o seu día a día como profesor de materias como Tecnoloxía, Física ou Química. Porén, Óscar deixounos ben claro que o seu "traballo" favorito é, sen dúbida; o de ser o papá de Julia.

Diego e Cintia tampouco quixeron deixar pasar a oportunidade de pasar pola biblio para manter un encontro co seu fillo Juan e os seus compañeiros de 2ºA. Durante o mesmo, Diego explicounos en que consiste o seu traballo como enxeñeiro  e con el aprendemos moitas cousas sobre a calefacción e o aire acondicionado. E, como vedes na foto, até algún afortunado, como Julia, puido empregar algún dos aparellos que adoita utilizar Diego no seu traballo. Pero non só Diego nos falou do seu oficio, senón que tamén Cintia nos explicou os segredos da contabilidade, e fíxoo dunha maneira tan amena e divertida que espertou esa vocación en máis de un.

Antonio, papá de Alicia, mantivo un encontro cos nenos e as nenas de 3ºC de Primaria no que falou do seu traballo como educador nun centro de menores. Respondendo con agarimo as mil e unha preguntas que lle foron realizando os rapaces, Antonio foinos explicando como é a vida dos menores nun centro desas características, que fan no seu día a día tanto internos como educadores, etc. A ningún dos presentes nos pasou desapercibida a paixón coa que Antonio fala do seu traballo.

En 1ºB tamén desfrutaron destes encontros, como o de Alberto, papá de Amanda, que nos falou do seu traballo nas Forzas Armadas e nos amosou o importante labor que levan a cabo en tarefas de rescate, de axuda humanitaria, de apoio á poboación civil en situacións de emerxencia... Das moitas cousas que nos contou, encantounos a idea de entender o seu traballo como servizo aos demais.

Os pícaros de 1ºB de Primaria tamén puideron coñecer que é o que fai un enxeñeiro civil, grazas a Juan Manuel, o papá de Martina. Juan Manuel explicounos como é o traballo que se desenvolve nunha obra, amosounos a maquinaria que se emprega e nos describiu como é a indumentaria que se debe utilizar para traballar neste sector.

En 1ºC, Bernardo, papá de Annette, explicounos cal é o traballo dun deseñador industrial. Con nós, lembrou como o seu soño infantil de ser inventor se fixo realidade co seu traballo e nos amosou algún dos seus proxectos. Con el vimos como unha idea xurdida na mente dunha persoa se transforma nun obxecto que pode facilitar a vida de moita xente.

David, papá de Valentina, explicoulles aos pícaros de 3ºB como é o seu traballo como policía. David lembrounos o importantes que é non falar con descoñecidos nin abrir a porta a estraños, e tamén nos recordou que, por se algún día nos perdemos, é moi importante que coñezamos o número de teléfono dos nosos pais e a nosa dirección.

Estes días continuaremos coas vosas visitas. A  todos os que xa vos pasastes por aquí, dámosvos as grazas. E todos aqueles que teñades ganas de vir pola biblio a pasar un momento divertido co grupo do voso fillo ou da vosa filla mentres nos falades do voso traballo, pero que aínda non o fixestes, tedes tempo ata finais de maio para visitarnos.

CONTOS E MÁIS CONTOS PARA CELEBRAR O DÍA INTERNACIONAL DO LIBRO

A medida que se ía aproximando a chegada do Día Internacional do Libro (23 de abril), a biblioteca foise convertendo nun verdadeiro fervedoiro de contacontos, nos que os libros, o teatro e os pícaros foron os grandes protagonistas. 

Agora que comezamos a desfrutar do bo tempo e que todos facemos máis vida ao aire libre, o contacto coa natureza sitúanos ao carón de todo tipo de pequenos animaliños. Disto foi do que nos falaron Enma e Chloe, alumnas de 5ºA de Primaria, quenes, a través das divertidas ilustracións creadas por Hélène Convert para o álbum Los bichos al dedillo (Combel), achegaron os nenos e as nenas de 4º de Infantil ao mundo das xoaniñas, as moscas, as bolboretas, os saltóns, as lombrigas, as abellas ou as cetonias.

Este non foi o único contacontos que puideron desfrutar os nenos e as nenas de 4º de Infantil. Así, grazas a Marian, a Iria, a Sofía, a Yaiza e a Daniela, alumnas de 6ºC de Primaria, os pícaros tamén viviron unha divertida sesión arredor do álbum A sopa queima (OQO), de Pablo Albo e André Letria.

Pola súa banda, os grupos de 5º de Infantil tamén puideron gozar de varios contacontos. Un deles correu a cargo de Nico, alumno de 6ºA de Primaria, que nos achegou á divertida historia de Pinto e Chinto Nicomedes o pelado (Kalandraka).

Olivia, Noa, Mencía, Lucía, Isabella e Ana Lucía, alumnas de 5º de Primaria, tamén lle quixeron demostrar aos nenos e ás nenas de 5º de Infantil que os libros poden ser moi divertidos, polo que leron para eles un dos fermosos álbumes de Anna Llenas, Te quiero (casi siempre). Con esta obra publicada por Espasa, traballamos o respecto á diferenza.

E tamén os nenos e as nenas de 6º de Infantil viviron a maxia dos contos grazas a Uxía Boquete, Uxía Astray, Irene e Martina, alumnas de 6º de Primaria. Con elas coñeceron a terrible cabra cabresa, do álbum O coelliño branco (Kalandraka), libro baseado nun conto popular portugués convertido xa nun verdadeiro clásico da literatura infantil grazas á Xosé Balesteros e Óscar Villán.