GRAZAS, FAMILIAS, POR ENCHER A BIBLIOTECA DE HISTORIAS E EMOCIÓNS

Con motivo do Día Internacional do Libro, convidámosvos ás mamás e aos papás do alumnado de Infantil e do 1º ciclo de Primaria a visitar a biblioteca escolar para compartir un conto co grupo do voso fillo ou filla.

Aínda que nun primeiro momento, esta actividade estaba prevista para a segunda quincena de abril, fostes tantos os que vos animastes a participar que tivemos visitas ata o día de hoxe. E non podemos estar máis agradecidos pola vosa implicación e entusiasmo.

Durante estas semanas, enchestes a biblioteca de contos, emocións, risas e momentos moi especiais. Cada lectura foi diferente, pero todas tiveron algo en común: a ilusión coa que compartistes ese tempo co alumnado. Os nenos e as nenas gozaron enormemente vendo as súas familias formar parte dun espazo tan importante para eles como é a biblioteca escolar.

Queremos darvos as grazas polo tempo, o cariño e a dedicación que puxestes nesta actividade. Grazas por acompañarnos, por compartir historias e por axudarnos a seguir facendo da lectura unha experiencia viva e emocionante.

O próximo curso, repetimos!

UN CURSO NA BIBLIO

Un curso na biblio do Fogar dá para moito: para que ti, Nico, lles ensines aos pícaros de Infantil o que é un kamishibai; para que os papás e as mamás nos visitedes para falarnos das vosas profesións; para que Noa e Enma decoredes a sala con murais inspirados nos libros que máis nos gustan; para que Isabella, Camila, Icía, Alba ou Jacobo rematedes os deberes na hora de estudo do mediodía; para que Carmen, María, Carlota ou Lucía fagades desfrutar aos pequenos cun divertido contacontos; para que Irene, Pepe, Marta, Antía, Sara, Andrea e Vera nos sorprendades cunha espectacular obra de teatro con horripilantes bruxas; ou até para que antigos alumnos como Natalia regaledes o voso tempo aos nenos e as nenas de Infantil e lles leades algúns dos seus contos favoritos.

Un curso na biblio dá para moitos bos momentos. Algúns deles volos amosamos neste vídeo co que agardamos que desfrutedes.

Un millón de grazas a todos os alumnos e alumnas que vos implicades nestas actividades e que convertides a biblio do cole nun fogar.

AS FAMILIAS CONTADES

Un dos pilares fundamentais da biblioteca do Fogar constituídelo vós, as familias. Por esta razón sempre nos gusta propoñervos actividades nas que poidades visitarnos, pasar un tempiño cos vosos fillos e o seu grupo, e coñecernos de maneira máis cercana a nós, os diferentes profesionais que, no día a día, pasamos tantas horas cos vosos pícaros.

Así, ao longo do curso irémosvos convidando a que veñades pola biblioteca a traballar con nós diferentes temáticas. Logo de desfrutar cos vosos contos de Samaín, nesta segunda quincena de novembro invitámosvos ás mamás e aos papás de Infantil e de 4º, 5º e 6º de Primaria a que nos visitedes para falarnos de grandes mulleres. Só tedes que pensar nalgunha figura feminina que vos pareza especialmente relevante no ámbito da ciencia, da arte, dos dereitos humanos, etc., e vir pola biblioteca a falar sobre ela co grupo dos vosos fillos, avisando previamente ao titor para fixar o momento da visita.

Esta actividade, destinada a traballar o Día Internacional da Eliminación da Violencia contra a Muller, pretende poñer en valor o papel da muller na sociedade.

Desde aquí animámosvos a participar e aproveitamos para darvos as grazas a todos aqueles que xa pasastes este curso pola biblioteca. Grazas por regalarnos o voso tempo.

E aqueles que non poidades vir pola bibloteca nesta ocasión, non vos preocupedes. En decembro teredes a oportunidade de visitar a biblioteca para lernos contos sobre o Nadal e para explicarnos como celebrades nas vosas casas esas datas.

ENTRE AVOAS E CONTOS, PASOU O SAMAÍN...

A semana pasada continuamos a recibir unhas visitas que nos encantan: as das avoas dos pícaros de Infantil e Primaria. Este foi o caso de Manuela, avoa de Enma, de 3ºC de Primaria, que nos levou de viaxe até os tempos da súa infancia e nos describiu como eran os xogos cos que se divertían neses anos, como eran as escolas e a comida desa época, etc. Tamén vivimos con ela a experiencia dunha muller traballadora nuns anos nos que, como nos contou, para a mentalidade de moitas persoas o feito de que unha muller traballase fóra da casa estaba mal visto. E con ela coñecemos máis cousas dunha familia moi especial para nós, como por exemplo, o seu libro favorito: El abuelo Camilo. 

Tamén Isabel, avoa de Miguel, alumno de 1ºB de Primaria, nos agasallou cun deses momentos que nos fan desfrutar de verdade, como é un contacontos realizado por unha persoa amante das palabras, das boas historias e dos nenos e das nenas do Fogar. Unha persoa, antiga profesora do noso colexio, á que desde aquí lle lembramos que esta sempre será a súa casa. Con Isabel viaxamos até a prehistoria a través do álbum Orq (de David Elliot, publicado por PlanetaDeAgostini) e das aventuras dos seus entrañables protagonistas: un neno cavernícola e o seu mamut.

Yolanda, avoa de Carlota, de 3ºA de Primaria, foi outra das valentes que nos visitou a pasada semana e á que lle temos que agradecer a súa amabilidade e cercanía con todos nós. Ademais, Yolanda nos fixo desfrutar con varios contos que nos encantaron: La hormiga Cantiga y el gigantón Glotón, El terrible señor Frog y La casa de chocolate.

E entre as visitas das avoas non podía faltar unha persoa sempre disposta a colaborar nas actividades que propoñemos: Mercedes, avoa de Pepe, de 1ºA de Primaria. Desde aquí queremos dar as grazas a Mercedes polas experiencias que compartiu con nós. Con ela asistimos ao colexio da súa infancia, vivimos como eran as festas na súa mocidade e experimentamos mil e unha vivencias dunha persoa que dedicou moitos anos da súa vida a unha profesión que lle encanta: a docencia. A Mercedes queremos dicirlle: grazas pola forza e a vitalidade que nos transmites cada vez que nos visitas.

E como vedes na foto de arriba, Mercedes tamén nos leu un conto sobre a festividade que estivemos a celebrar a semana pasada: o Samaín. O álbum O noso Samaín, de Loretta Birott Bermejo, e publicado por Editorial Galaxia, foi unha das lecturas que protagonizou moitas das sesións de biblioteca nestes días. Un dos grupos que máis desfrutou coa obra foi 2ºB de Primaria, que a escoitou da boca dunha das nosas contacontos favoritas: a nosa compañeira Paula.

O Samaín e o magosto foi o tema de investigación estrela nestes días, e nel se centraron grupos como o de 4ºA de Primaria, que, coa axuda da súa profe Ana, está a aprender un montón de cousas sobre estas festividades. 

E na semana do Samaín non podían faltar os contos de monstros, pantasmas e bruxas. Unha destas últimas, a Bruxa Gertrudis, foi a protagonista do contacontos que realizou a profe Puri na sesión semanal de biblioteca de 6ºA e 6ºB de Infantil. Con esta divertida bruxa e con esta contacontos de primeira, os pícaros de  pasárono en grande.

E logo de escoitar o conto, nada mellor que colorear algunhas das ilustracións do álbum:

Mais como non todo ían ser bruxas e Samaín, outros grupos, como 4ºB e 4ºC de Infantil decidiron centrarse noutras temáticas, como as aves. Así, as profes Nerea e Natalia leron para os pícaros dúas obras que nos encantan: O polo Pepe (SM)  e Kiwi (La Fragantina).

Logo da lectura presentaron varios dos libros sobre aves cos que conta a biblio e explicaron onde estaban situados:

Finalmente, os pícaros mergulláronse entre as páxinas de diferentes libros sobre esta temática e, coa axuda das profes, foron recollendo información sobre a mesma:

A semana do Samaín rematou e outra comezou, con novos contos, novas visitas e novas actividades. Moi pronto teredes noticias delas!

AVOAS, AVÓS, PANTASMAS E MONSTROS DE CORES, MENTRES CHEGA O SAMAÍN

Esta semana os grupos fixeron moitas cousas na biblioteca. Queredes coñecer algunhas delas?

Unha das actividades que máis tempo nos ocupou foi a de mergullarnos nos libros da biblio. Logo de moito mirar, todos fomos escollendo algunha obra para levar en préstamo para as nosas casas. Isto foi o que fixeron, por exemplo, os pícaros de 5ºC de Infantil. 

Pero antes de dedicarnos a iso dos libros, os alumnos de 5ºC puideron desfrutar da visita de Antonio, avó de Paulo, alumno deste grupo. Antonio falou da súa infancia en Camariñas, fíxonos desfrutar coas historias que nos contou e nos sorprendeu a todos cuns fantásticos trucos de maxia que nos deixaron a todos coa boca aberta!

E é que esta semana seguimos coa actividade do "Mes dos avós", segundo a cal os avós e as avoas de Educación Infantil e de 1º, 2º e 3º de Primaria, que teñades ganas de vir á biblioteca a pasar un tempiño cos vosos netos e cos seus compañeiros, estades invitados. Olga, avoa de Adrián, alumno de 5ºA de Infantil, foi outra das que nos visitou estes días para contarnos unha fermosa historia coa que rematamos plantando unha semente. Ao encontro con Olga acudiron os pícaros de 5ºA e 5ºB de Infantil, que o pasaron en grande escoitando a esta avoa xenial.

A avoa Remedios tamén nos regalou o seu tempo e nos visitou para manter un encontro coa súa neta Aroa e os seus compañeiros de 4ºA de Infantil, no que ademais de contar Os tres porquiños, falou dos xogos da súa infancia, como a billarda.

En Primaria tamén desfrutamos con estas visitas, como a dunha extraordinaria contadora de historias como María, avoa de Isabella, que fixo as delicias da súa neta e dos seus compañeiros de 1ºB.

Pola súa banda, María, avoa de Lucía e de Andrea, de 2ºA de Primaria, quixo visitarnos para participar no proxecto central deste curso, dedicado a achegarnos ás tradicións galegas. Así, María leu para nós dúas lendas da nosa terra, grazas ás cales agora coñecemos un pouco máis sobre a noite de San Xoán e sobre un ser terrorífico: o lobishome.

Mari Carmen agasallou á súa neta Carmela e aos outros alumnos de 3ºA achegándoos aos relatos dun dos grandes autores da nosa literatura: Neira Vilas.

E tamén Luisa quixo vir pasar un momentiño con nós, no que nos levou de viaxe polo mundo coas súas historias e nos explicou como era o seu traballo como modista. O seu neto Mateo e os seus compañeiros de 3ºC de Primaria desfrutaron enormemente escoitándoa.

Desde aquí queremos dar as grazas ás avoas e aos avós que vos estades animando a participar nesta actividade. Grazas por implicarvos desta forma na educación dos vosos netos e por ensinarnos tantas cousas a todos.

E grazas tamén a aqueles alumnos que dedicades os recreos a vir á biblioteca a ensaiar contacontos e obras de teatro para representar diante dos máis pequenos. Entre todos vós, esta semana queremos destacar o grupo formado por catro alumnas de 6ºC de Primaria: Irene, Olalla, Sabrina e Paula. Os pícaros de 6ºA e 6ºB de Infantil pasárono en grande co voso contacontos de O monstro de cores (Flamboyant), de Anna Llenas.

E unha vez rematada a lectura da obra, todos falamos das nosas emocións e pintamos monstros de cores:

Outro dos contacontos que destacaremos desta semana, e que tamén nos levou a falar das nosas emocións, foi o que realizaron as titoras de 4º de infantil a partir do álbum Unha pantasma con asma, escrito por Carmen Gil e ilustrado por Sarah Webster para Kalandraka.

Logo da lectura, nada mellor que fabricar a nosa propia saba para pantasmas.

E, por suposto, esta semana continuamos a investigar sobre diferentes temas, como os seres vivos (4ºC de Primaria).

Ou como o Samaín e o magosto (4ºA de Primaria).

A próxima semana continuaremos a divertirnos e a aprender nunha biblioteca que é vosa: a biblioteca do Fogar. Boa fin de semana a todos!