PERCORREMOS PORTUGAL E A ARXENTINA COS PÍCAROS DE 6º INF. A

Desde comezos de curso andamos a achegarnos ás diferentes nacionalidades presentes no noso colexio. Logo do traballado no 1º trimestre, comezamos o 2º con moitas ganas de mergullarnos en novas temáticas e novos países. Así, ao longo de varios meses investigamos sobre aspectos diversos e, agora, chegou a hora de transmitir todo o que aprendemos a outros grupos. Nas últimas semanas do 2º trimestre, os diferentes grupos foron pasando pola biblioteca para falarnos de costumes e tradicións, de música e danzas, de historia e de grandes persoeiros e, incluso, de gastronomía. Precisamente disto, de comidas típicas de Portugal e da Arxentina, foi do que falaron os pícaros de 6ºInf. A ante os seus compañeiros de 6ºInf. B.

Nesta viaxe por Portugal, degustamos pratos coma estes:

Caldo verde

Bolinhos de bacalhau

Bacalhau á portuguesa

Pasteis de Belém

E a viaxe gastronómica pola Arxentina non foi menos suculenta:

Asado arxentino

Pastel de carne

Alfajores

Pasta frola

Tan ben o fixeron os pícaros de 6ºInf. A, que os seus compañeiros de 6ºInf. B permaneceron así de atentos en todo momento:

VISITAMOS COLOMBIA CON LUZ

Hai uns días visitounos Luz, mamá de Naiala, que pasou pola biblioteca para falarnos do seu país natal, Colombia, o cal andamos a estudar en 1ºC de Primaria dentro do proxecto deste curso.

Con Luz achegámonos á bandeira do país:

Às súas principais cidades:

Bogotà

Medellín

Cali

Á súa gastronomía, dentro da cal destacan pratos como as arepas ou o sancocho:

Arepas

Sancocho

E, como non, á súa música, como o merengue e a cumbia, danzas que bailamos ao final da sesión.

Queremos agradecer enormemente a Luz que nos regalase o seu tempo e que nos ensinase tantas cousas de Colombia.

CON YSAURA, ACHEGÁMONOS A MARÍA PARADO DE BELLIDO, UNHA DAS GRANDES HEROINAS DA HISTORIA DO PERÚ

Hai uns días recibimos a visita de Ysaura, mamá de Kealan, de 5ºInf. C. Ysaura, natural do Perú, pasou pola biblioteca con motivo do Día Internacional da Muller para falarnos dunha das grandes mulleres da historia peruana: María Parado de Bellido.

Con ela, achegámonos á figura desta heroína, mártir da independencia do Perú, que expoñendo o seu propio benestar, sacrificou a súa vida antes de delatar a outros patriotas que, coma ela, servían á causa da liberdade.

O alumnado de 5º de Infantil seguiu, moi atento, a historia desta muller valente:

Queremos dar as grazas a Ysaura por regalarnos o seu tempo e por ensinarnos tantas cousas.

CON NAYARA, COÑECEMOS A FRANCES BUSS E A EMILY DAVIES

Este curso andamos a viaxar polos países do mundo a través das distintas nacionalidades presentes no noso cole, polo que con motivo do Día Internacional da Muller traballamos diferentes figuras femininas relevantes nalgúns dos países que andamos a estudar. Nayara, con raíces en Inglaterra, visitounos para manter un encontro co seu fillo Thiago e os seus compañeiros de 5ºInf. B, no que se detivo en dúas mulleres inglesas destacadas: Frances Buss e Emily Davies

Tal e como nos contou Nayara, estas dúas mulleres son un exemplo na loita a prol dos dereitos da muller. Frances Buss foi unha educadora británica, pioneira na defensa do dereito da muller á educación. Esta loita foi compartida tamén por Emily Davies, unha das primeiras defensoras do dereito da muller a entrar na universidade, cofundadora e primeira directora do Girton College, un dos 31 colexios universitarios da Universidade de Cambridge, primeiro colexio feminino de Inglaterra e modelo de igualdade e inclusión desde os seus inicios.

Frances Buss

Emily Davies

Encantounos coñecer a estas dúas mulleres xeniais, polo que mentres escoitabamos a Nayara, estivemos así de atentos:

Queremos dar as grazas a Nayara por dedicarnos o seu tempo e por achegarnos a estas dúas grandes mulleres.

VISITAMOS DE NOVO INGLATERRA CON CHRIS

Se hai unhas semanas Chris nos visitou para manter un encontro co seu fillo Mario e os seus compañeiros de 2ºB, nesta ocasión volveu para levar de viaxe até Inglaterra, o seu país natal, ao seu outro fillo, Félix, e os seus compañeiros de 5ºC.

Nesta visita, Chris contounos moitas cousas de Inglaterra, e un dos momentos que máis nos gustou foi cando nos falou dos deportes máis populares na súa terra. Así de atentos estivemos á súa explicación:

Chamáronnos especialmente a atención dous deportes como o criquet e o croquet. Grazas a el, agora xa coñecemos as diferenzas entre un e outro.

Criquet

Croquet

Mais o momento máis emocionante foi, sen dúbida, cando Chris nos falou sobre diferentes xogos populares ingleses e mesmo nos puxo a practicalos:

 


O noso xogo favorito foi aquel no que, cada final de curso, os alumnos tiran esponxas molladas á cara do seu profesor.

Logo de practicar coa cara de diferentes personaxes, a profe María permitiu aos seus alumnos cumprir o soño de moitos estudantes e animouse a poñerse na diana:

Queremos dar as grazas a Chris por achegarnos ao seu país, Inglaterra, dunha forma tan divertida.

COÑECENDO KENIA CON KEVIN

Este curso temos o pracer de ter entre nós a Kevin, que nos está a axudar a mellorar o noso inglés exercendo como auxiliar de conversa co alumnado dos distintos niveis. Xa que este curso andamos cun proxecto no que estamos a estudar as distintas culturas e os diferentes paises do mundo, decidimos pedirlle que nos falase do seu país: Kenia. 

Aquí vos deixamos unhas fotos dunha destas sesións, en concreto a celebrada con 5º Inf. B.

Neste encontro, Kevin amosounos a bandeira de Kenia:

Falounos das cidades máis importantes do país, como a capital, Nairobi:

Unha cidade na que se poden ver imaxes tan fermosas como esta:

Kevin tamén nos falou da flora e da fauna de Kenia, e dos impresionantes parques naturais, como o Parque Nacional de Tsavo:

Outro dos momentos que máis nos gustou, foi cando nos presentou persoas destacadas do país. A que máis nos impresionou foi Wangari Maathai, activista política e ecoloxista, que se converteu na primeira muller africana en recibir o Premio Nobel da Paz no 2004.

Ao longo dos vindeiros meses continuaremos a coñecer máis cousas sobre Kenia con Kevin.

PERCORREMOS O SENEGAL CON ADAMA

En 1ºB de Primaria andan a investigar sobre o Senegal, país de procedencia de Fatou, unha das alumnas do grupo. Para axudar aos pícaros, este pasado xoves tivemos a sorte de recibir a visita de Adama, que pasou pola biblioteca para manter un encontro coa súa filla Fatou e cos seus compañeiros, no que lles presentou o seu país natal.

Adama explicounos onde está situado o Senegal, falounos das principais tradicións do país, presentounos algúns dos persoeiros máis destacados, achegounos ao día a día dunha escola senegalesa, etc.

Non esqueceremos a descrición que nos fixo da capital do país, Dakar.

Cos seus coloridos mercados...

E as súas fermosas praias...

Tamén nos chamaron moito a atención os pratos tradicionais do país, como o tieboudienne, un pastel de peixe con herbas e arroz.

E, por suposto, nos encantou aprender palabras en wólof, a lingua máis falada do país, con algo máis de catro millóns de falantes nativos e arredor de dezaoito millóns de  falantes que a empregan como segunda lingua.

E como non podía ser menos diante dun grupo tan deportista, Adama tamén nos falou dos principais deportes que se practican no Senegal, entre os que o auténtico rei é, tal e como nos dixo, o fútbol.

Queremos dar as grazas a Adama por dedicarnos o seu tempo, por ensinarnos tantas cousas do Senegal e por dirixirse a todos nós cun eterno sorriso na cara.