PETER PAN, WENDY, CAMPAÍÑA E O CAPITÁN GARFO REMATAN A SÚA XIRA POLAS AULAS CON MOTIVO DO DÍA DO LIBRO

Con motivo do Día do Libro, na nosa biblioteca escolar vivimos unhas semanas cheas de maxia, sorpresa e ilusión grazas ao Grupo de Teatro, que levou a historia de Peter Pan ás aulas de Infantil e do primeiro ciclo de Primaria.

A proposta non podía ser máis especial: as representacións aparecían por sorpresa. No medio da rutina diaria, cando menos o agardaban, o alumnado vía como as súas aulas se transformaban nun pequeno escenario onde Peter, Wendy, Campaíña e o Capitán Garfo cobraban vida. Esta irrupción inesperada converteu cada actuación nunha experiencia aínda máis emocionante, espertando a curiosidade e a imaxinación desde o primeiro momento.

A través do teatro, os nenos e nenas puideron achegarse a unha historia clásica da literatura infantil dun xeito diferente, participativo e moi próximo. As risas, as miradas de asombro e a implicación do público foron a mellor mostra do éxito da actividade.

Desde a biblioteca queremos agradecer especialmente a dedicación e o entusiasmo do Grupo de Teatro, que fixo posible esta iniciativa, así como a acollida por parte do profesorado e do alumnado.

Con actividades como esta, seguimos apostando por fomentar o gusto pola lectura, a creatividade e o amor polas historias que nos fan soñar.

Ata a próxima aventura!

ESTREAMOS O MAGO DE OZ

Estes días o grupo de teatro de Secundaria estreou a adaptación teatral do Mago de Oz, a coñecida obra de L. Frank Baum. Foron xa varios os grupos de Infantil que puideron desfrutar do marabilloso traballo destas actrices e actores xeniais. Nas vindeiras semanas, novos grupos terán o pracer de asistir a novas representacións da obra.

UN CURSO NA BIBLIO

Un curso na biblio do Fogar dá para moito: para que ti, Nico, lles ensines aos pícaros de Infantil o que é un kamishibai; para que os papás e as mamás nos visitedes para falarnos das vosas profesións; para que Noa e Enma decoredes a sala con murais inspirados nos libros que máis nos gustan; para que Isabella, Camila, Icía, Alba ou Jacobo rematedes os deberes na hora de estudo do mediodía; para que Carmen, María, Carlota ou Lucía fagades desfrutar aos pequenos cun divertido contacontos; para que Irene, Pepe, Marta, Antía, Sara, Andrea e Vera nos sorprendades cunha espectacular obra de teatro con horripilantes bruxas; ou até para que antigos alumnos como Natalia regaledes o voso tempo aos nenos e as nenas de Infantil e lles leades algúns dos seus contos favoritos.

Un curso na biblio dá para moitos bos momentos. Algúns deles volos amosamos neste vídeo co que agardamos que desfrutedes.

Un millón de grazas a todos os alumnos e alumnas que vos implicades nestas actividades e que convertides a biblio do cole nun fogar.

CONTOS E MÁIS CONTOS PARA CELEBRAR O DÍA INTERNACIONAL DO LIBRO

A medida que se ía aproximando a chegada do Día Internacional do Libro (23 de abril), a biblioteca foise convertendo nun verdadeiro fervedoiro de contacontos, nos que os libros, o teatro e os pícaros foron os grandes protagonistas. 

Agora que comezamos a desfrutar do bo tempo e que todos facemos máis vida ao aire libre, o contacto coa natureza sitúanos ao carón de todo tipo de pequenos animaliños. Disto foi do que nos falaron Enma e Chloe, alumnas de 5ºA de Primaria, quenes, a través das divertidas ilustracións creadas por Hélène Convert para o álbum Los bichos al dedillo (Combel), achegaron os nenos e as nenas de 4º de Infantil ao mundo das xoaniñas, as moscas, as bolboretas, os saltóns, as lombrigas, as abellas ou as cetonias.

Este non foi o único contacontos que puideron desfrutar os nenos e as nenas de 4º de Infantil. Así, grazas a Marian, a Iria, a Sofía, a Yaiza e a Daniela, alumnas de 6ºC de Primaria, os pícaros tamén viviron unha divertida sesión arredor do álbum A sopa queima (OQO), de Pablo Albo e André Letria.

Pola súa banda, os grupos de 5º de Infantil tamén puideron gozar de varios contacontos. Un deles correu a cargo de Nico, alumno de 6ºA de Primaria, que nos achegou á divertida historia de Pinto e Chinto Nicomedes o pelado (Kalandraka).

Olivia, Noa, Mencía, Lucía, Isabella e Ana Lucía, alumnas de 5º de Primaria, tamén lle quixeron demostrar aos nenos e ás nenas de 5º de Infantil que os libros poden ser moi divertidos, polo que leron para eles un dos fermosos álbumes de Anna Llenas, Te quiero (casi siempre). Con esta obra publicada por Espasa, traballamos o respecto á diferenza.

E tamén os nenos e as nenas de 6º de Infantil viviron a maxia dos contos grazas a Uxía Boquete, Uxía Astray, Irene e Martina, alumnas de 6º de Primaria. Con elas coñeceron a terrible cabra cabresa, do álbum O coelliño branco (Kalandraka), libro baseado nun conto popular portugués convertido xa nun verdadeiro clásico da literatura infantil grazas á Xosé Balesteros e Óscar Villán.

COÑECEMOS A COCO CHANEL, TRABALLAMOS A AUTOESTIMA E DESFRUTAMOS CON PELOSTORTOS E CUNHA RATIÑA MOI PRESUMIDA

A pasada semana deu para moito na biblioteca do Fogar. Sofía, Sara, Carmen, Vera, Andrea e Irene, de 5º de Primaria, quixeron celebrar o Día Internacional da Muller cos pícaros de 4º de Infantil. Para iso decidiron escenificar para eles unha dramatización sobre unha das figuras femininas ás que Alba Editorial lle adica un dos volumes da súa coñecida colección "Pequeña y grande". Así, a partir desta fermosa obra creada por María Isabel Sánchez Vegara e Amaia Arrazola, a deseñadora Coco Chanel visitou a biblio nunha sesión chea de sorpresas.

Pola súa banda, Nico e Ariel, de 6º de Primaria, aproveitaron a hora de biblioteca dos grupos de 6º de Infantil para traballar cos nenos e as nenas un elemento fundamental no desenvolvemento de toda persoa: a autoestima. Para iso leron o álbum Cosas que me gustan de TI, de Trace Moroney, logo do cal todos fomos dicindo aquelas cousas que máis nos gustan dos nosos compañeiros. Ao remate de cada sesión, todos marchamos contentos, pois ao escoitar aos nosos compañeiros nos fomos dando conta de que cada un de nós posuimos características marabillosas: uns somos moi amables, outros moi divertidos, outros moi xenerosos, outros moi enxeñosos....

E, unha semana máis, Pelostortos, volveu visitar a biblioteca da man de Lucía, Andrea, Nico, Osmani e Bradley, de 6º de Primaria. Os nenos e as nenas de 5º de Infantil desfrutaron cunha sesión tan terrorífica como divertida co estarrecedor protagonista do álbum creado por Ana García Castellano e Mikel Mardones para OQO.

E como somos uns grandes amantes dos clásicos,  Carla, Noa e Uxía, de 6º de Primaria, decidiron dramatizar para os pícaros de 5º de Infantil A ratiña presumida, na versión creada por José Antonio López Parreño e Pablo Mestre para Kalandraka.