FELIZ DÍA DO LIBRO 2024!

Desde o Fogar desexámosvos un feliz Día do Libro! E para celebralo, aquí van unhas cantas recomendacións lectoras:

DÍA INTERNACIONAL CONTRA A ESCRAVITUDE INFANTIL: LECTURAS RECOMENDADAS

Aínda que poidamos pensar que a escravitude infantil é un mal do pasado, o certo é que na actualidade máis de 200 millóns de nenos e nenas seguen a padecer esta triste realidade, a través do traballo forzoso, a escravitude doméstica, o matrimonio forzado, o recrutamento como soldados...

Por esta razón, até que ningún neno no mundo se vexa obrigado a sufrir traballlos ilegais, degradantes e perigosos, é tan importante que continuemos a crear conciencia sobre este tema. Con este obxectivo, diversas ONG impulsaron en 1997 a creación do Día Internacional contra a Escravitude Infantil, data que se vén celebrando desde ese ano cada 16 de abril. 

O detonante desta celebración foi honrar a memoria de Iqbal Masih, un neno paquistaní que, logo de fuxir do traballo forzado ao que se viu sometido desde os catro anos, comezou a denunciar a escravitude que padecían moitos pícaros coma el nas fábricas de alfombras do seu país. A súa loita a prol dos dereitos da infancia o levaría a ser asasinado o 16 de abril de 1995.

Cremos que a historia de valentía e de loita de Iqbal é un exemplo que merece ser coñecido por todos, polo que aquí vos recomendamos tres obras nas que poderedes achegarvos á súa figura:

-Malala/Iqbal (Juventud): este álbum ilustrado, creado por Jeanette Winter para lectores a partir de 7 anos, permitirá aos cativos coñecer, dunha maneira sinxela, a figura de Iqbal. Ademais, esta obra achéganos a unha segunda historia igual de valiosa, a de Malala Yousafzai, unha valente nena paquistaní que sufriu un atentado por mor da súa actividade como firme defensora do dereito das nenas a ir á escola.

-La historia de Iqbal (SM): esta obra de Francesco D'Adamo está dirixida a lectores de 10 a 14 anos e pertence á Serie Vermella da prestixiosa colección El Barco de Vapor, da editorial SM. O libro achéganos á historia de Iqbal a través da vida de Fátima, unha rapaza paquistaní que traballa recluída nunha fábrica de alfombras á que un día chega un neno escravo, Iqbal, que iniciará unha dura loita contra a escravitude infantil.

-Iqbal Masih. Lágrimas, sorpresas y coraje (Oxford): Miguel Griot nos trae esta obra dirixida a lectores a partir de 14 anos, na que coñeceremos como foi realmente a historia de Iqbal a través do testemuño de diversas persoas que o coñeceron. Nestas páxinas poderedes ver como se converteu en neno escravo, como eran as condicións de vida na fábrica de alfombras na que era obrigado a traballar até 12 horas diarias, como logrou fuxir desa terrible situación e como se converteu nun símbolo na loita a prol dereitos da infancia.

Co fermoso sorriso de Iqbal, despedímonos desexando que a historia deste neno valente nos inspire a todos para loitar, como fixo el, a favor dun mundo máis xusto.

DÍA MUNDIAL DA SAÚDE: LECTURAS PARA TODA A FAMILIA

Hoxe, 7 de abril, celébrase o Día Mundial da Saúde, data que se vén festexando desde 1948, ano no que a Asemblea Mundial da Saúde escolleu este día para conmemorar a creación da Organización Mundial da Saúde (OMS). Coa celebración desta data preténdese, entre outras cousas, fomentar hábitos sans nas persoas. Dentro deles, ten unha especial importancia o tema da alimentación, polo que aquí vos deixamos unha pequena listaxe de libros na que encontraredes, por unha banda, obras infantís coas que poderedes tratar cos pícaros esta temática, e por outra, libros para adultos nos que poderedes encontrar recomendacións para mellorar a alimentación de toda a familia, conceptos como o de "ultraprocesado", análises sobre como inflúe a alimentación dos nenos no rendemento escolar, a importancia de comer en familia...

-A eiruguiña comellona (Kókinos): este clásico da literatura infantil, creado por Eric Carle, é unha obra ideal para traballar cos máis pequenos a alimentación saudable, resultando moi útil para familiarizalos coas diferentes froitas que aparecen no libro (mazás, peras, ameixas, amorodos e laranxas) e para amosarlles o boas que son para a saúde. Ademais, na obra vemos como a eiruga se sente mal cando come máis da conta, polo que tamén nos servirá para lembrarlle aos pícaros que é importante parar de comer cando un se sente cheo. Encontrámonos tamén con que a eiruga sofre de dores de barriga cando come alimentos pouco saudables, como pasteis ou chocolatinas, problema que soluciona grazas a unha folla verde. Isto permitiranos falar cos pequenos sobre os beneficios que os alimentos como as verduras ou as hortalizas teñen para a nosa saúde.

-La rebelión de las verduras (Lumen): esta divertidísima obra de David Aceituno e Daniel Montero Galán é ideal para achegarnos cos nosos pequenos ao mundo das verduras e dos beneficios que estas teñen para a nosa saúde. A bo seguro que escacharedes coa risa coas diferentes personaxes que aparecen na obra, unhas enfadadas verduras que inician unha revolución porque están fartas de que os nenos non terminen o prato e sempre prefiran comer macarróns.

-El recetario mágico (Play Attitude): dirixida a lectores a partir de 6-7 anos, esta obra de Desiree Arancibia achegaravos a receitas, feitizos e pocións para unha alimentación sa, divertida e nutritiva. A través dun mundo máxico, a obra espertará, a bo seguro, a curiosidade dos rapaces por descubrir os ingredientes das diferentes receitas. O libro proporciona, de maneira amena, información sobre alimentación saudable, grupos de alimentos, o aceite, o azucre, os produtos ecolóxicos..., e ofrece tamén un exemplo de menú semanal. Ademais, nel encontraredes receitas para as diferentes comidas do día, elaboradas con produtos saudables, como verduras, froitas, cereais, tofu, peixe...

-Una cocina tan grande como un huerto (Kókinos): este libro de gran formato, creado por Alain Serres e Martin Jarrie, e dirixido a lectores a partir de 8-9 anos, achéganos a 60 receitas que servirán aos rapaces para descubrir froitas e hortalizas de todo o mundo. Nelas atoparemos tomates, pementos, chícharos, cabazas, plátanos, ameixas, amorodos, dátiles..., e moitos máis ingredientes sans e saudables, protagonistas dunhas receitas que os nenos poderán preparar sós ou en familia.

-Come comida real (Paidós): este libro sitúanos perante unha guía práctica que nos axudará a desterrar os ultraprocesados da nosa alimentación e a volver comer o que o seu autor, o dietista e nutricionista, Carlos Ríos, denomina "comida real". Aqueles que desexedes achegarvos a esta obra, poderedes ler un fragmento da mesma picando aquí.

-Alimentación saludable para niños geniales (Amat Editorial): neste libro, escrito pola dietista-nutricionista e doutora en Bioquímica Griselda Herrero, veremos como unha alimentación sa e equilibrada, xunto coa actividade física, unha boa saúde do sono e unha correcta educación emocional, inflúe no rendemento escolar dos cativos.

-Coaching nutricional para niños y padres (Grijalbo): este libro de Yolanda Fleta e Jaime Giménez achéganos abondosa información sobre nutrición e sobre estratexias para conseguir que os nosos fillos coman san e se sintan mellor con eles mesmos e desenvolvan a súa intelixencia emocional. Nas páxinas da obra aprenderemos cales son aqueles alimentos que nos conveñen e cales non e poderemos elaborar entre toda a familia o menú semanal.

-El jamón de York no existe (La esfera de los libros): Marián García, doutora en Farmacia e graduada en Nutrición Humana e Dietética, ofrécenos un libro no que poderedes encontrar información sobre alimentación saudable e sobre como esta comeza á hora de facer a compra. 

DÍA MUNDIAL DOS DEREITOS DO CONSUMIDOR: POR UN CONSUMO RESPONSABLE, SOSTIBLE E RESPECTUOSO CO MEDIO AMBIENTE

En 1983, a ONU instituìu o Día Mundial dos Dereitos do Consumidor, que se vén celebrando desde entón cada 15 de marzo. Este ano, os esforzos ao celebrarmos este Día céntranse en sensibilizar sobre a necesidade dun consumo máis racional e sostible, respectuoso coa contorna, e combativo co risco real que supón a contaminación por plásticos.

Porque cremos que o respecto ao medio ambiente é cousa de todos, aquí vos deixamos varias ligazóns á web da OCU, nas que poderedes atopar abondosa información sobre temas como a obsolescencia ou a reciclaxe, e sobre os sete pasos que todo consumidor pode seguir para frear a contaminación por plásticos: 

-Reemplazar o plástico por outras alternativas.

-Replantexarse se de verdade é imprescindible recorrer a el.

-Rexeitar produtos con exceso de embalaxes.

-Reducir o número de residuos.

-Reutilizar os obxectos dos que non poidas prescindir.

-Reciclar os restos de xeito adecuado.

-Reparar antes de desbotar.

E, por suposto, aquí vos recomendamos unha lectura, axeitada para lectores a partir de 8 anos, que vos permitirá afondar neste tema: Un mar de plásticos, de Kirsti Blom e Geir Wing Gabrielsen, publicada en castelán por Takatuka.

Nesta obra explícasenos como cada ano se fabrican centos de toneladas de plástico, un 10% das cales van parar ao mar, o que está a provocar a formación de xigantescas illas de lixo, como a enorme mancha de residuos do Pacífico, situada entre o Xapón e os Estados Unidos, e que posúe un tamaño máis grande que España, Francia e Alemaña xuntas.

Nas páxinas do libro, veredes como o océano se está a converter nun xigantesco vertedoiro de lixo, que afecta gravemente á saúde da flora e a fauna mariñas. 

A historia dun fulmar boreal, un ave mariña que habita as costas do Atlántico Norte, serve de fío condutor para explicar as fatais consecuencias do uso masivo de plástico e a necesidade de limitar drásticamente o seu uso. 

Picando aquí, poderedes ver unha mostra do interior do libro.

DÍA INTERNACIONAL DA MULLER: LECTURAS PARA ESO, FP E BACHARELATO

Se onte vos deixabamos unha listaxe de lecturas, dirixidas ao alumnado de Infantil e Primaria, dedicadas a traballar a igualdade de xénero e a poñer en valor o papel da muller na sociedade, nesta ocasión, toca centrarnos nos cursos superiores. Así, tamén para o alumnado destes niveis fixemos unha selección de libros cos que pretendemos poñer o noso pequeno gran de area nese inmenso traballo que é a coeducación.

Agardamos que estas dez obras que vos propoñemos, adecuadas non só para o 8 de marzo, Día Internacional da Muller, senón para calquera día do ano, nos leven a todos ao desfrute coa lectura, á reflexión e á concienciación. Na listaxe poderedes encontrar novela, álbum ilustrado, poesía, relatos, teatro e até novela gráfica. Picando no título, atoparedes información sobre cada unha das obras propostas e mesmo poderedes acceder, nalgúns casos, aos primeiros capítulos das mesmas.

1.Mujeres de ciencia (Nórdica Libros): comezamos a nosa listaxe recomendándovos tres xoias literarias escritas e ilustradas por Rachel Ignotofski,. A primeira delas nos achega a cincuenta mulleres que, en diferentes épocas, acadaron grandes logros no eido da ciencia, a tecnoloxía, a enxeñaría ou as matemáticas. Nestas páxinas, fermosamente ilustradas, poderedes coñecer moitas cousas sobre figuras tan sobranceiras como Hipatia, Marie Curie, Jane Goodall, Ada Lovelace ou Valentina Tereshkova, pero tamén sobre outras mulleres que, malia os seus logros, acadaron menos renome, como Karen Horney, Gerty Cori ou Patricia Bath.

2.Mujeres en el arte (Nórdica Libros): o segundo dos libros que vos propoñemos de Rachel Ignotofski. Coa mesma estructura do anterior, nesta ocasión a autora achéganos a mulleres destacadas no mundo da arte, desde Frida Kahlo ou Georgia O`Keeffe até Tarsila do Amaral ou Zaha Hadid.

3.Mujeres en el deporte (Nórdica Libros), a terceira das obras de Rachel Ignotofski, preséntanos, na mesma liña que as anteriores, a 50 destacadas deportistas cuxos logros van desde a década de 1800 até a actualidade. Nestas páxinas podemos ver figuras tan coñecidas como a tenista Serena Williams, pero tamén moitas outras máis anónimas, como Patti McGee, pioneira do skateboarding.

4.El diario azul de Carlota (Destino): escrito por Gemma Lienas e recomendado para nenas e nenos a partir de 12 anos, trátase dunha obra imprescindible que se centra na violencia de xénero, pero que tamén trata a violencia infantil e a violencia escolar.

5.Astrolabio (Anaya): Premio SGAE de Teatro Infantil 2018, esta obra escrita por Paco Romeu e ilustrada por Ana Oncina, fálanos da viaxe de Duna, unha nena beduina que logrará fuxir dun matrimonio concertado. Libro recomendado a partir de 12 anos.

6.Como tú: 20 relatos + 20 ilustraciones por la igualdad (Anaya): outra obra imprescindible para xóvenes a partir de 14 anos, na que vinte escritores e vinte ilustradores se xuntaron para crear un libro que nos fala de igualdade e do poder da educación como ferramenta fundamental para lograr un mundo máis xusto en cuestión de xénero.

7.Miedo a los perros que me han dicho que no muerden (SM): Javier García Rodríguez agasállanos cunha xoia literaria, dirixida a maiores de 14 anos, na que a través da poesía envía unha mensaxe de igualdade entre os xóvenes. Este libro forma parte da campaña "Orgullosa de ti", desenvolvida pola editorial SM, e que busca fomentar a igualdade a través da lectura, mediante obras que nos ofrecen protagonistas femininas fortes e independentes. O poemario que aquí vos recomendamos trata de acabar con certos estereotipos, como a existencia de cousas de chicos e cousas de chicas, e centra a súa mensaxe nos medos dos xóvenes. Como mostra, deixámosvos un podcast no que atoparedes un petisco da beleza, a sensibilidade e a forza deste poemario. Non tedes máis que picar aquí.

8.La tribuna (SM): un clásico do s.XIX, no que Emilia Pardo Bazán nos sitúa nunha sociedade machista e hipócrita na que unha humilde obreira trata de loitar pola xustiza. Axeitado para lectores a partir de 14 anos.

9.Sally Heathcote. Sufragista (Ediciones La Cúpula): esta novela gráfica de de K. Charlesworth, Bryan Talbot e Mary M. Talbot, dura e realista, constitúe unha lectura imprescindible para todo aquel que desexe coñecer como foi a loita por acadar o voto para as mulleres.

10.Yo soy Malala (Alianza Editorial): nesta listaxe non podía faltar o testemuño de Malala Yousafzai, unha valente rapaza de Pakistán tiroteada polos talibáns por mor da súa loita a prol do dereito das nenas á educación.

DÍA INTERNACIONAL DA MULLER: LECTURAS PARA INFANTIL E PRIMARIA

Xa falta moi pouco para o 8 de marzo, data na que se celebra o Día Internacional da Muller. Por esta razón, desde a Biblioteca Agustín Fernández Paz decidimos recomendarvos unha serie de lecturas nas que a muller e a igualdade de xénero son as grandes protagonistas.

A continuación deixámosvos unha selección de obras para o alumnado de Infantil e Primaria, coas que a bo seguro poderedes desfrutar toda a familia.

1.A historia dos bonobos con lentes (Kalandraka), escrito por Adela Turín e ilustrado por Nella Bosnia: 

2.O libro dos Porcos (Kalandraka), escrito e ilustrado por Anthony Browne:

3.Bonitas (Astronave), escrito por Stacy McAnulty e ilustrado por Joanne Lew-Vriethoff

4.Até as princesas soltan peidos (Algar Editorial), de Ilan Brenman.

5.Soy una diosa guerrera (Editorial Kairós), de Jennifer Adams.

6.¿Hay algo más aburrido que ser una princesa rosa? (Thule), de Raquel Díaz Reguera.

7.Inventoras y sus inventos (Flamboyant), escrito por Aitziber López e ilustrado por Luciano Lozano.

8.Rosa Parks (Colección pequeña y Grande, Alba Editorial), escrito por María Isabel Sánchez Vegara e ilustrado por Marta Antelo.

9.Los cuentos que nunca nos contaron (Nube de tinta), VV.AA.

10.Cuentos de buenas noches para niñas rebeldes (Destino), escrito por Elena Favilli e Francesca Cavallo.

11.El lápiz mágico de Malala (Alianza Editorial), escrito por Malala Yousafzai e ilustrado por Kerascoet.

12.Ellas cuentan (SM), de Katherine Halligan.

13.Las cholitas de Bolivia (Edebé), escrito por Claudia Bellante e ilustrado por Anna Carbone.

14. Sara y las goleadoras (Destino), de Laura Gallego e Laia López.

15.10 niñas que se hicieron Grandes (Bruño), escrito por Aida Cosentino e ilustrado por Pedro Perles.

16.Mujeres exploradoras (Vicens Vives), de Riccardo Francaviglia e Margherita Sgarlata.

17.Pioneiras (Xerais), escrito por Anaír Rodríguez e ilustrado por Nuria Díaz.

18.100 mujeres que cambiaron el mundo (RBA), escrito por Sandra Elmert e ilustrado por Cuchu.

19.Ellas, 30 grandes mujeres que cambiaron la historia (Susaeta), escrito por José Morán e ilustrado por Marta Anais.

20.¡Cambios, cambios, cambios! (SM), de Marawa Ibrahim.

A HISTORIA DE ERIKA

Hoxe, 27 de xaneiro, data na que se celebrou o "Día Internacional de Conmemoración en Memoria das Vítimas do Holocausto", queremos recomendarvos unha lectura: A historia de Erika, con texto de Ruth Vander Zee e ilustracións de Roberto Innocenti, publicada en galego pola editorial Kalandraka.

"Nacín en 1944. Non sei o día. Non sei que nome me puxeron. Non sei en que cidade nin en que país vin ao mundo. Tampouco sei se tiven irmáns. O que sei é que cando a penas contaba cuns meses salváronme do Holocausto..."

Esta obra sitúanos ante unha historia estremecedora e impactante, a de Erika, unha muller marcada polo seu pasado, o dunha supervivente do maior xenocidio cometido no século XX, e que hoxe, moitos anos despois da liberación do campo de exterminio de Auschwitz, nos serve para concienciar aos novos lectores dunha traxedia que nunca debe repetirse.

RECOMENDACIÓNS PARA O VERÁN (2ªPARTE)

Chegados xa ao ecuador do verán, aínda vos queda por diante todo o mes de agosto para desfrutar dos amigos, da praia, das viaxes e, como non, de mil e unha lecturas. Para todos aqueles que non teñades claro que libro escoller para ler estes días, aquí vos deixamos algunhas suxestións:

Boas vacacións!

UNHA VIAXE Á ÉPOCA MEDIEVAL

Esta semana que entra vai ter lugar na Coruña a XXI edición da Feira das Marabillas coa que, un ano máis, a cidade viaxará á Idade Media a través dun mercado que vos permitirá observar de preto como era a vida naquela época. Entre o olor das especias e a cor dos estandartes, poderedes mergullarvos en infinidade de postos con artigos de todo tipo e desfrutar de impresionantes exhibicións, como xustas e espectáculos con lume.

E para todos aqueles que queirades desfrutar un pouco máis da Idade Media, aquí vos deixamos algúns libros ambientados nesa época. Todos eles podedes encontralos tanto na biblioteca do Fogar como nas Bibliotecas Municipais da Coruña.

Camiño perigoso, de Ánxela Loureiro, é unha apaixonante novela de aventuras ambientada na Idade Media, na que a acción, o drama, o amor e o humor se mesturan nun interesante relato que achega o lector a algunhas das claves fundamentais para entender a época medieval. A obra, está protagonizada por unha rapaza de trece anos que se ve obrigada a coidar dos seus irmáns pequenos, logo da desaparición dos seus pais. Pouco a pouco irase decatando das inxustizas que rodean a xente da súa clase e se lanzará a unha arriscada viaxe na procura dos seus pais, mergullándose así nunha aventura chea de perigos, medos, adversidades e doenzas que fará vibrar o lector que se atreva a navegar polas páxinas deste libro excepcional.

Cruzada en "jeans" é unha obra da holandesa Thea Beckman, ambientada, como o seu título indica, na época das Cruzadas. Nela atopamos a Rudolf, un rapaz do século XX que, logo de se prestar para participar nun experimento científico, viaxa no tempo até 1212. Transportado a esa época pasada, encóntrase casualmente cunha cruzada infantil que se dirixe a Terra Santa coa fin de liberar Xerusalén. Desde un primeiro momento, Rudolf centrará todos os seus esforzos en axudar os nenos a superar as numerosas dificultades que se irán encontrando no seu camiño: abusos, fame, enfermidades, guerras, secuestros..., e pouco a pouco, se irá convertendo no auténtico líder do grupo.

La espada y la rosa, de Antonio Martínez Menchén, sitúanos na Baixa Idade Media e cóntanos a historia de Moisés, fillo do barón de Forner. O neno, trala morte do seu pai nas Cruzadas, é desposuído do seu título e da súa herdanza por culpa do seu malvado tío que, ademais, pretende asasinalo. Porén, o pequeno sálvase da morte grazas á intervención dun criado que o ata a un escudo e o pon a salvo por medio da corrente dun río. Un monxe, o irmán Martín, será quen o encontre e quen se ocupará de educalo entre as ruinas dun convento abandoado. Alí permanecerá Moisés até a chegada dun estraño peregrino, cuxa aparición lle permitirá ao noso protagonista iniciar unha emocionante aventura que non só o levará a coñecer mundo, senón que tamén lle permitirá descubrir un importante segredo relacionado coas súas orixes.

En Finis Mundi, a autora, Laura Gallego, nos leva até a Francia do ano 997 da nosa era, onde Michel, un monxe cluniacense, decide embarcarse nunha misión imposible co obxectivo de salvar o mundo. A orixe desta viaxe serán as revelacións do ermitán Bernardo de Turinxia, nas que se anuncia que a fin do mundo é inminente e que só existe unha maneira de salvar a humanidade: invocar o Espírito do Tempo. Porén, antes é preciso recuperar os tres eixes sobre os que se sostenta a Roda do Tempo. Nesta busca, a Michel se lle unirán un xograr chamado Mattius e unha xoven aspirante a xograresa, Lucía, que terá que demostrar que pode ser tan boa no oficio coma calquera home. Este curioso trío vivirá unha aventura chea de perigos e intrigas que os levará a percorrer a Europa de finais do primeiro milenio.

La catedral, de César Mallorquí, é unha historia ambientada no s.XIII e protagonizada por Telmo Yáñez, un xoven artesán que parte cara a Gran Bretaña para participar na construción dunha catedral, porén, esta estraña e colosal edificación alberga segredos terribles. Poderá Telmo superar as dificultades que encerra esta apaixonante aventura? Para saber a resposta deberás mergullarte nas páxinas desta novela de misterio que se adentra no mundo dos artesáns libres, dos templarios e das cruzadas.

RECOMENDACIÓNS PARA O VERÁN (1ªPARTE)

Algúns dos vosos compañeiros non quixeron marchar de vacacións sen recomendarvos unhas lecturas para o verán. 

Por iso, antes de acabar o curso gravaron uns vídeos para compartir con vós as suxestións que cren que non debedes esquecer. 

Aquí tedes unhas cantas:

UNHA NOITE DE MISTERIO...

Pode que para esta noite teñas pensado baixar dar un paseo cos teus amigos, ou quizais ir ao cine ou a un concerto. Se é así, esperamos que te divirtas por todo o alto. Porén, se vas pasar o día na praia ou xogando ao fútbol e o que realmente che vai apetecer facer pola noite é descansar un pouco na casa, desde o blog propoñémosche un plan: unha noite de misterio da man de Laura Gallego e a súa obra La hija de la noche. 

E: por que ía ler esta obra?, estaraste a preguntar... Pois a resposta é doada: porque nas súas páxinas poderás mergullarte no misterio que invade a vida dunha tranquila aldea francesa, Beaufort, cuxa paz se ve repentinamente alterada por un feito que, a priori, semella carecer dunha explicación razoable: o granxeiro Henri Morillon encontrou unha das súas vacas morta en extrañas circunstancias, completamente desangrada. Algúns habitantes da aldea, como o xoven Jerome, cren que a mansión Grisard garda certa relación co suceso. O vello caserón permanecera deshabitado e abandoado durante moitos anos, até que se instala nel a fermosa e enigmática Isabelle, que regresa á localidade que a viu nacer e da que fuxiu tempo atrás. O misterio que rodea a esta muller espertará as sospeitas dos seus veciños, e Max, o xendarme do lugar, decide comezar a investigar. Por se estas liñas aínda non te convenceron, aquí che deixamos un booktrailer da obra:

Xa te decidiches? Pois adiante! Bule até as Bibliotecas Municipais da Coruña e leva en préstamo un exemplar desta obra!

A NOITE DAS CACHARELAS

Esta noite, na do paso do día 23 ao 24 de xuño, conmemórase unha festa que se vén celebrando desde ben antigo en moitos lugares, e que está ligada aos festexos que acompañan a chegada do solsticio de verán. Xa sabedes de que estamos a falar? Pois sí, da Noite de San Xoán, unha festividade cuxas orixes se remontan aos tempos anteriores á chegada do cristianismo. Hai que dicir que, se ben o acontecemento solar ten lugar o día 21 de xuño, a festa trasladaouse ao 24 xa que, segundo a tradición, esa sería a data na que naceu San Xoán.

Moitos ritos de carácter máxico ou relixioso se asocian a esta festa: saltar as famosas lumeiradas para purificarse, pór un ramo de herbas de San Xoán nas portas da casa coa fin de protexerse das meigas, lavarse ao amencer nun manancial ou con auga de rosas, etc.

Porén, como non todo nesta data vai ser saltar lumeiradas, tamén podedes mergullarvos nas páxinas dunha das máis apaixonantes e divertidas aventuras de Os Barbanzóns, maxistralmente creada por Pepe Carreiro, e que xira arredor dunha noite tan máxica como da que estamos a falar. Esta aventura en banda deseñada leva por título A noite das cacharelas, e podédela atopar nas Bibliotecas Municipais da Coruña.

E á volta do verán, cando comece o novo curso, non dubidedes en acudir á biblioteca do Fogar a desfrutar das aventuras desta familia celta.

ASMIR NO QUIERE PISTOLAS

Hoxe comezaron as vacacións e, polo tanto, o tempo de xogos, de praia e de longas tardes desfrutando da familia e dos amigos. Porén, quizais a algún de vós, mentres toma o sol na praia ou xusto antes de deitarse, lle apeteza relaxarse mergullándose nalgunha historia. Hoxe, 20 de xuño, Día Mundial do Refuxiado, recomendámosvos o libro Asmir no quiere pistolas, da autora australiana Christobel Mattingley, un relato baseado en feitos reais que constitúe unha clara denuncia contra a guerra. 

A obra (que podedes encontrar nas Bibliotecas Municipais da Coruña) iníciase cos primeiros días da guerra en Bosnia no ano 1992 e os primeiros bombardeos sobre Saraxevo. Nesta cidade vive o protagonista, Asmir, un neno musulmán que vai tomando conciencia da crueldade e da senrazón que está a vivir. Con Saraxevo convertido nun inferno, a súa tía Melita chama desde Belgrado: hai un avión que está a evacuar a mulleres e nenos. Asmir, o seu irmán pequeno, a súa nai e maila súa avóa, coa axuda de seu pai, conseguen embarcar nel e refúxianse na capital de Serbia. Alí tampouco se senten seguros, polo que, pouco tempo despois, inician unha nova fuxida cara a Austria, unha viaxe que estará pragada de dificultades. Lograrán Asmir e a súa familia superalas e chegar a Viena? Coseguirá Muris, o pai do protagonista, sobrevivir ao inferno de Saraxevo?

Asmir no quiere pistolas é un relato realista que reflexa a situación dos refuxiados bosnios, dispersos por diversos países europeos. A historia destaca polo seu dramatismo e a súa emotividade, cun narador que vai dando conta dos terribles sucesos que acompañan todo conflito bélico: os primeiros bombardeos, a fuxida, a adaptación a un novo país, etc. A obra é un deses libros que non deixan indiferente ao lector, pois Asmir, ese neno que vive feliz coa súa familia e os seus amigos até que chega o horror da guerra, poderiamos ser calquera de nós. E ao igual que el, nós tamén temos algo claro: NON QUEREMOS PISTOLAS!

"Pero Asmir tenía muchos otros compañeros de juegos. Todos los días se veían en el parque del barrio, y echaban carreras entre los árboles, jugaban al escondite, montaban en los columpios y el subibaja, se perseguían y rodaban por la hierba y se divertían mucho.
Hasta que un día llegó la guerra a Sarajevo. Aparecieron centenares de soldados que disparaban rifles y ametralladoras. Las calles retemblaron al paso de los tanques y sobre la ciudad volaron aviones que lanzaban bombas."