CEBRAS, OSIÑOS E UN CAZO VISITAN A BIBLIOTECA

Esta semana a biblioteca encheuse dos máis diversos animais e até dun cazo grazas ao esforzo de diferentes estudantes de Primaria, que desenvolveron para 5º e 6º de Infantil contacontos como Riciños de ouro. A posta en escena deste clásico da literatura infantil  correu a cargo de Leo, Carolina, Manuel, Martina Labandeira e Martina Molejón, de 5ºA:

Non quixeron faltar a esta actividade Iria, Sofía, Marian, Irene, Alba e Claudia, alumnas de 5ºB e 5ºC, que desenvolveron para os pícaros de Infantil unha obra fundamental para traballar a solidariedade e a independencia: A cebra Camila.

Carla, Noa, Candela e Uxía, de 5ºB, tamén nos achegaron a valores esenciais a través da representación da obra O cazo de Lorenzo, un conto metafórico para falar cos máis pequenos sobre as diferenzas e a capacidade de superación que posuímos cada un de nós.

Da man do alumnado de Primaria, a próxima semana novas historias visitarán a biblioteca para achegar aos pícaros de Infantil ao mundo dos contos.

TRABALLAMOS A AUTOESTIMA CON IRENE, ANTÍA E MARTA

Esta semana estivemos a traballar cos pícaros de Infantil un aspecto tan importante como a autoestima, grazas a Antía, Marta e Irene, alumnas de 4º de Primaria, que leron para diferentes grupos o álbum Cosas que me gustan de Mí (SM), de Trace Moroney.

Durante a lectura da obra, os nenos e as nenas permeneceron moi atentos:

A continuación, falamos das cousas que nos gustan de nós mesmos e logo fomos explicando o que máis nos gusta dos nosos compañeiros. Así, grazas a Marta, Irene e Antía, fómonos decatando de que cada un de nós estamos cargados de cousas positvas.

Queremos dar os parabéns a estas tres contacontos de primeira por todo o esforzo amosado nos ensaios e polo cariño co que trataron aos nenos e as nenas de Infantil. 

A próxima semana continuaremos cos contacontos na biblioteca, con especial protagonismo para un álbum que nos achegará a valores fundamentais como a solidariedade, a empatía, a xenerosidade ou a autonomía. Estámonos a referir á obra A cebra Camila (Kalandraka), un clásico da literatura infantil creado por Marisa Núñez e Óscar Villán que a bo seguro fará desfrutar aos pícaros de Infantil.

COCORICO, UN CROCODILO E AS CATRO ESTACIÓNS PARA DESPEDIR O 1º TRIMESTRE

Para despedir o 1º trimestre, estudantes de 4º e 5º de Primaria quixeron agasallar aos pícaros de Infantil cunhas sesións de contacontos. 

Así, estes días, a biblioteca recibiu, por exemplo, a visita de Cocorico (OQO), da man de Nerea, Sofía, Yaiza e Noa, de 5ºC:

Jimena e Sofía, de 5ºB, fixeron desfrutar aos pequenos coa obra Las cuatro estaciones en un día (Bruño):

E Sofía, Andrea e Sara, de 4ºA, sorprenderon ao seu público con El cocodrilo al que no le gustaba el agua (Picarona):

Desde aquí queremos felicitar a todas estas extraordinarias contacontos, que durante semanas empregaron moitos dos seus recreos en vir ensaiar á biblioteca co obxectivo de divertir aos máis pequenos. 

UN AGASALLO MOI ESPECIAL

Hai uns días vivimos un momento moi especial na biblioteca do Fogar. Loli sorprendeu aos seus antigos alumnos de Infantil, que actualmente xa andan a cursar 2º de Primaria, cunha divertida sesión na que, primeiro, lles leu un deses contos cos que tanto os facía desfrutar:

E logo, coa axuda de Alba, desenvolveu unha representación con dúas personaxes aos que os pícaros teñen moito cariño, Lili e Lolo, dous simpáticos monicreques creados por Loli durante a pandemia para divertir e acompañar aos seus alumnos durante eses momentos. 

Os pícaros desfrutaron enormemente neste encontro sorpresa con súa antiga profe Loli, nunha sesión que lles serviu, ademais, para lembrar algúns momentos inesquecibles do seu paso por Infantil.

IRIA FÁLANOS DA DIVERSIDADE E DO VALOR DA DIFERENZA

Con motivo do Día Internacional das Persoas con Discapacidade (3 de decembro), os pícaros de 1ºA de Primaria tiveron unha sesión de biblioteca moi especial esta semana. Nela, a nosa compañeira Iria, do Departamento de Orientación, desenvolveu unha actividade na que todos puidemos achegarnos á realidade dunha serie de persoas con diferentes tipos de diversidade. 

E por suposto, Iria tamén leu un conto que fala precisamente da diversidade, e que pon en valor as diferenzas, fronte a quen as convirte en motivo de burla. Este álbum ilustrado, que vos recomendamos a todos, trátase de Orellas de bolboreta (Kalandraka), con texto de Luisa Aguilar e ilustracións de André Neves.

Desde aquí queremos dar as grazas a Iria por todo o que nos ensinou durante unha sesión que nos encantou a todos.

ROSALÍA DE CASTRO, ISABEL ZENDAL, CONCEPCIÓN ARENAL, CLARA CAMPOAMOR E OUTRAS GRANDES MULLERES NAS VISITAS POLO 25 N

Estes días estamos asistindo ás últimas visitas con motivo do Día Internacional da Eliminación da Violencia contra as Mulleres, grazas ás cales o alumnado está a achegarse a figuras femininas da talla de Rosalía de Castro, Isabel Zendal, Clara Campoamor, Concepción Arenal ou Emilia Pardo Bazán.

Desde aquí queremos darvos as grazas pola vosa participación nesta actividade. Ademais, as familias do alumnado de Ed. Infantil e de 1º e 2º de Primaria quedades convidados a visitar a biblioteca durante este mes para contarnos como celebrades vós o Nadal ou para lernos algún conto relacionado con esas datas. 

XA TEMOS GAÑADORAS DO CONCURSO POLA SEMANA DA CIENCIA E A INNOVACIÓN!

Como lembraredes, hai uns días celebramos na biblioteca a XXII Semana da Ciencia e a Innovación coa exposición "O Hardware", elaborada desde o Departamento de Informática. Con ela, pretendíase achegar ao alumnado os diferentes compoñentes dun ordenador.

Unha das actividades relacionadas coa devandita exposición consistía nun concurso no que os estudantes, unha vez visitada a exposición, debían dar resposta a un encrucillado que poñía sobre a mesa diferentes cuestións traballadas durante a visita.

Entre todos aqueles estudantes que cubriron correctamente o encrucillado fíxose un sorteo para escoller dous gañadores: un na categoría de Primaria e outro na categoría de Secundaria. As afortunadas foron Irene Vigo Blanco (6ºEPO A) e Laura Sánchez Avilez (1ºESO A).

Aquí podedes velas recibindo cadanseu libro como recompensa ao seu esforzo:

Desde aquí queremos dar os parabéns a Irene, a Laura e ao resto de participantes na actividade.