ENTREVISTAS XORNALÍSTICAS 1ºESO

 

Mentres un é novo sempre ten tempo para todo

 

José Manuel García (61 anos, naceu en Brexo-Lema, Cambre) cóntanos algo da vida nos anos sesenta, setenta e oitenta, que era moi diferente á de agora.

 

Nerea García Boga (1º ESO B)

 

Como se chama?

José Manuel García, aínda que todo o mundo me coñece por Corredoira.

 

Cantos anos ten?

Hai pouco cumprín 61 no mes de marzo.

 

Onde naceu?

Nacín nunha pequena parroquia do concello de Cambre que se chama Brexo-Lema.

 

Cóntenos un pouco da súa familia?

Veño dunha familia moi humilde. Son o mediano de cinco irmáns. Somos tres homes e dúas mulleres. O meu pai estaba enfermo e non podía traballar. Miña nai andaba ao xornal polas leiras dos veciños. Así nos axudaban para poder comer un pratiño de caldo ou unha boa cunca de leite.

 

Como foi a súa infancia?

Aínda que pasabamos algunha necesidade, podo decir que foi unha infancia feliz. Fun á escola, aínda que aos 14 anos xa me tiven que poñer a traballar para axudar na casa con algúns cartos. Eramos tres irmáns na casa. Os dous maiores xa emigraron, pois aquí non había moitas oportunidades.

 

Entón, como tivo que empezar a traballar moi novo, non foi un mozo de moitas festas ou si?

(Ri) Mentres un é novo sempre ten tempo para todo. Traballaba, xogaba ao fútbol e mais tiña tempo para ir de verbena, que che me gustaba ben.

Xogaba ao fútbol? En que equipo?

Xoguei no Brexo-Lema, de dianteiro. Xoguei dende o ano 1979 ata o 1990. Xogamos en terceira rexional.

 

E como coñeceu a súa muller?

Aínda que soe raro, coñézoa de sempre. Dende nenos eu xa fun á súa primeira comuñón pois tocamos algo na familia. O seu avó e miña nai eran irmáns.  Vamos, que a miña sogra era miña curmá.

 

Cantos anos levan casados?

Para agosto fará 39 anos que nos deron dous filllos e unha neta.

 

Fala habitualmente en galego?

Si, dende neno eu sempre falei galego porque era a lingua que me ensinaron meus pais. E sigo falando galego no día a día. Se ben é certo que se alguén non me entende, fálolle en castelán.

 

José Manuel García demostrou que con poucos anos puido axudar a súa familia e mais desfrutar da súa xuventude.