VISITA DO ILUSTRADOR JOSE SOUTO

Esta mañá tivemos a sorte de recibir no Fogar a visita do ilustrador Jose Souto, que xa estivo con nós hai unhas semanas facendo desfrutar os nenos de 1ºA e 1ºC de Primaria cunha sesión na que nos leu dous dos contos que ilustrou: Mundo de cores e Chusco, un can vagabundo. Nesta ocasión, foron os pícaros de 1ºB e de 6ºInf. A os que desfrutaron coa visita. Jose nos leu Mundo de cores, un álbum con texto de Maruxa Blanco e ilustracións de María Romero e do propio Jose Souto, publicado pola ONG Viraventos. Neste conto, ideal para traballar a educación intercultural, achegámonos á historia de Diara, unha nena "senegalega"que nos presentou o seu mundo de cores, a súa familia, os seus costumes e tradicións...

Jose tamén nos leu Chusco, un can vagabundo, un fermoso álbum ilustrado por Jose e con texto de Begoña Ibarrola, publicado pola editorial Primerapersona, que nos conta a historia de Chusco, un can vello e enfermo que vivía na rúa. O soño de Chusco era ter un dono que o quixese. Unha noite, os seus amigos, decidiron axudalo...

Ademais de lernos estes dous contos, Jose fíxonos viaxar por algúns dos recunchos máis fermosos da arquitectura coruñesa.

Logo, os pícaros, inspirándose no que Jose nos acababa de amosar, crearon as súas propias casas, cheas de vistosas cores.

Desde aquí queremos dar as grazas a Jose pola divertida sesión que nos ofreceu e, tamén, polos libros que nos deu como agasallo. Estas obras, por suposto, foron Mundo de cores e Chusco, un can vagabundo.